我盡力學習成為男人！《1+1+1》張達倫將繼女視如己出，愛老婆Kimmy起床的樣子，愛是接納對方所有～

By Aisa on 26 Feb 2019

唔知大家最近有無留意由車婉婉主持嘅TVB節目《1+1+1》，每集都會請來星級爸媽分享湊仔經，同埋佢地家庭背後嘅故事。剛播出一集就邀請咗張達倫同埋佢嘅太太Kimmy，佢地仲帶埋囝囝碩碩一齊嚟接受訪問，整集嘅內容都好甜蜜好溫馨，觀眾們都不禁要大讚張達倫真係一個暖男呀！

Photo from TVB

原來老婆Kimmy係張達倫哥哥嘅同學，起初佢地兩個人都各有伴侶，所以一直只係維持點頭之交嘅關係。但幾年後重遇，當時雙方已經回復單身，亦因為有行山呢個共同興趣而非常投契，而擦出愛火花～

Photo from TVB

而Kimmy同前夫有一個囡囡Chloe，不過張達倫完全唔介意，將Chloe視如己出：「我永遠把她當作自己的女兒，如果不接納的話，你有什麼資格去愛這個女人？」呢一番真摯且霸氣嘅言論，感動唔少觀眾，愛一個人就係要愛佢嘅全部！

Photo from TVB

而喺訪問前同中途，都可以見到唔少佢兩公婆嘅甜蜜互動，就好似張達倫細心地幫太太整理衣領、甜蜜地介紹「他是張達倫的老婆」等。一個個看似平凡嘅舉動，卻令Kimmy同觀眾們都暖在心頭～

Photo from TVB

當被問到「對上一次覺得對方靚是何時？」，Kimmy立即告白：「就是剛剛」，而張達倫就話係兩三日前瞓醒見到老婆，就覺得佢真係好靚，身邊有一個時刻都懂得欣賞你嘅人，實在係好值得感恩。

Photo from TVB

不過唔講唔知，原來最初張達倫雖然已經認定咗Kimmy，不過就未有結婚嘅念頭，直到有一日佢突然諗到「要不要小孩子呢？」，當下先下定決心要向Kimmy求婚。而喺籌備當中，佢發現婚禮唔止係一個過程，同時都係自己對Kimmy嘅一份承諾！求婚嘅時候，張達倫仲播咗一首歌，佢話「愛情令缺點有了知音」同埋「我盡力學習成為男人」呢兩句歌詞好重要，仲即場唱一次比太太聽，令太太非常感動，整個畫面充滿愛，旁人都不禁鼻酸～