譚凱琪感謝天嬌一角：「終於有代表到我嘅劇」，人靚聲甜憑《大帥哥》爆紅！

By Aisa on 09 Jan 2019

紅爆劇集《大帥哥》今個星期就大結局，唔少人放工之後都趕住番屋企開電視煲劇，劇入面除咗張衛健演技亮眼出色之外，戲份相當多嘅「天嬌」譚凱琪（Zoie）亦被唔少觀眾大讚，人氣馬上急升！最近劇情就講到天嬌已經公開咗自己係間諜嘅身份，不過有情有義嘅佢已經愛上咗大帥哥，於是為咗佢放棄國家，呢個雙面人嘅角色設定真係令觀眾憎唔落呀～

劇入面有一幕講到天嬌因為被大帥哥出賣，一邊喊住一邊話自己為咗大帥哥可以犧牲、背叛國家，呢段真情對話帶動唔少觀眾嘅情緒，天嬌都只係一個陷入愛情嘅小女人，大家睇到呢一幕都忍唔住眼濕濕～！

今次天嬌一角，確實令譚凱琪人氣增加唔少，好多網民都大讚：「譚凱琪喺一班同張衛健有對手戲嘅女演員入面，佢同張衛健嘅Level最接近」、「天嬌你做得好好，你先係女主角，你死左唔想睇了」、「TVB欠譚凱琪一個女演員獎項」、「你演的好好我忍不住哭」，從呢啲留言中可以清楚感受到觀眾們對譚凱琪嘅支持～

唔講唔知譚凱琪曾經係「日本樂壇教父」小室哲哉嘅徒弟，2000年簽約小室哲哉公司ROJAM，去日本受訓過4個月，之後亦有推出唱片，可見佢嘅唱功都有返咁上下功力！而佢最近仲翻唱日本歌手荒木毬菜嘅《小雨と君》表明心迹，將對大帥哥嘅愛慕之情盡訴曲中～

譚凱琪外表甜美可人，但其實佢已經37歲～因為保養得宜，所以佢嘅皮膚依然白哲緊緻，而且身材仲好好！除咗有樣有身材之外，譚凱琪仲好錫屋企人～佢由18歲開始出嚟打工養家，將一半收入俾媽媽作為家用，當自己工作收入唔穩定時亦都繼續俾錢屋企。之前有雜誌影到佢同媽咪行街仲會幫媽媽整理鞋帶；亦都會喺空餘時間陪爸爸行山，話佢係乖乖女相信無人會質疑～