沈卓盈入行16年決定離巢，拒絕再做溫室小花～經歷最黑暗的2年，全靠男友不離不棄！

By Aisa on 09 Jan 2019

Photo from jessie_sum@Instagram

沈卓盈上年年尾同TVB嘅約合到期，唔經唔覺佢已經成為TVB藝人16年～沈卓盈話過呢16年過得好快，而當中有甜酸苦辣，唔同回憶，不過一切造就咗今日嘅佢，令佢成長。

Photo from jessie_sum@Instagram

沈卓盈表示上年年頭開始要同公司傾續約，佢考慮咗成年，心入面十五十六，佢知道留喺到有一定好處，公司比咗一個好好嘅平台佢去發揮，但另一方佢覺得畢竟已經16年，自己一直都係一朵被好好保護嘅溫室小花，佢認為係時候比自己出去見下世界，接受下挑戰，所以最後決定離開。

Photo from jessie_sum@Instagram

沈卓盈當年18歲，因為貪玩而參選無綫第四屆「《TVB周刊》Cover Girl選舉」，結果成為冠軍入行。佢仲記得返工當天，爸爸比咗張金牛佢「壓袋」，當時佢覺得一千蚊已經係好多錢，於是佢就拎住呢張金牛去返工，同自己講唔可以亂咁使錢，因為屋企人賺錢好辛苦。

Photo from jessie_sum@Instagram

自從沈爸爸喺佢出道嘅時候比過一千蚊佢之後，佢都再無問家人拎過錢。而對佢嚟講最重要嘅唔係要屋企人比好多野佢，反而係佢可以比到咩屋企人～所以佢由第一個月出糧開始，就半份糧比家人，之後十幾年都一樣，用呢個方法報答屋企養育之恩。

Photo from jessie_sum@Instagram

而於喺TVB嘅甜酸苦辣，佢話：「甜係因為好多同事好錫我，有時冇時間食嘢，佢哋會買飯盒同咖啡畀我，真係好窩心。酸係令我諗起拍《怒火街頭》時，我畀楊天經喺泳池㩒頭落水嗰場戲，我唔識游水，咁啱嗰日替身no show，我個頭㩒到落到水底，好辛苦，我細個有浸親陰影，我又唔識呼吸，嗰次飲咗好多啖泳池水，覺得自己好可憐，咪好辛酸囉，好彩拍完，導演收貨。」

Photo from jessie_sum@Instagram

至於苦當然就係拍戲時候，未必每場都可以做到一百分，而佢事後會諗番點解做得唔夠好，都有試過番屋企途中因為好忟自己做得唔夠好，而遺憾到喊出嚟。辣就係可以挑戰唔同角色：「記得拍《古靈精探B》時，監製叫我跳舞，我未問跳乜嘢舞就話好，最終知道係鋼管舞，立即滴汗，始終未接觸過，見到條鋼管唔識埋去，我撞到成隻腳瘀晒，於是的起心肝搵導師學，排咗一段分幾、兩分鐘舞，用一星期速成，真正拍攝時就豁出去，我同自己講咁辛苦學番嚟，唔可以拍唔好，一定要爭氣，終於完成咗。」

Photo from jessie_sum@Instagram

2016年、2017年同2018年，呢三年對沈卓盈嚟講好難忘，2016年佢經歷咗爸爸患病，到2017年爸爸不幸離世，呢件事對佢打擊好大。而呢段時間，全靠男朋友喺佢身邊比好多支持同鼓勵，呢兩年間佢幾乎每晚都喊，而男朋友晚晚聽佢呻，安慰佢，不離不棄。亦因為咁男朋友成為佢嘅精神支柱，無論佢開心、唔開心，都會第一時間喺佢身邊，聽佢分享。