發文悼念亡母：每一天都在掛念您！肥姐沈殿霞離世11年，欣宜希望母親今日仍與她同在～

By Aisa on 20 Feb 2019

一個追逐夢想的女生，深信未來是屬於相信心中美夢的人。

肥姐沈殿霞2008年因患肝癌過身，至今已經離世11年，但大家心中一直未忘記過佢。昨日（19日）肥姐囡囡鄭欣宜就發布IG Story悼念亡母，指自從肥姐離世後，佢每一日都會掛住佢，字裡行間盡露對肥姐嘅思念同孝心，令人睇嘅人都有啲鼻酸。

Photo from princejoyce@Instagram

昨日，鄭欣宜喺IG發布Story，上載同媽咪肥姐嘅合照，並用英文寫道：「11 years. I only love and miss you more each day. There’s not a single day that goes by without me thinking of you. Europe is gorgeous! Wish you were here to breathe in the beauty with me. Always and forever.」欣宜表示11年來，每一日都會掛念媽咪，更希望肥姐宜家仍然同佢同在，陪佢享受人生路上每個美麗時刻。

Photo from princejoyce@Instagram

被香港人稱為開心果嘅肥姐沈殿霞，2006年因為患上肝腫瘤，而被逼暫停演藝工作，抗病兩年不幸於2008年逝世，當時肥姐62歲，留下同前夫鄭少秋所生嘅囡囡欣宜。欣宜自細就成日跟住肥姐，所以觀眾們早已認識佢，佢長大後亦跟隨母親加入娛樂圈，兩母女感情好好，肥姐患病後都曾經話過最放唔低係個囡，仲付託圈中好友要幫忙照顧欣宜。

Photo from princejoyce@Instagram

肥姐既係欣宜嘅母親，亦係佢嘅偶像～佢話過即使身邊好多資深行內前輩，但最大嘅榜樣都依然係媽媽沈殿霞：「媽咪非常敬業樂業，她對所有人的態度一致，不會偏袒；演出亦從不出錯，不會失準。她在生病前，已常說要退休，我笑道她怎會捨得！我跟她最似的，是對工作的熱愛，如果我有機會一直留在這行，同樣是永不言休的人。」

Photo from princejoyce@Instagram

出道多年，欣宜面對過唔少言論，亦被批評過：「你全靠父母，不是父母，你什麼都不是」，不過近年欣宜喺樂壇站穩陣腳，證明就算肥姐唔喺身邊，佢都能夠獨當一面照顧自己，靠實力成功，佢感慨話：「曾經，我以為要幫媽咪爭氣；現在，沒這樣想，也沒時間這樣想，這樣想很蠢的，活，要為自己而活。」相信喺天上嘅肥姐見到欣宜今日咁叻女、咁識諗，都會好安慰～