無Mandy大小姐點算啊！Mandy博士將暫別《愛回家》，觀眾直呼：好唔捨得、好難受～！

8點檔《愛．回家之開心速遞》一直係觀眾最愛，無論劇情同人物角色都好豐富吸引，收視甚至好過黃金時段或者大製作劇集！不過日前播出嘅一集令觀眾迎來一個壞消息，就係博士同Mandy呢對CP將會暫別《愛回家》，令好多人都直呼：「好難過、好唔捨得！」

早前Mandy因喺「橙不忍島」帶咗橙入境而被拉，放監後佢決定立即去英國讀法律，而男友博士為咗長期陪伴愛人，決定跟埋Mandy去英國，於是向熊樹根辭職離開「速熊」。

其實自Mandy坐監後就久未露面，而大小姐嘅秘書都由「垃圾清」頂上，本來觀眾仲好期待Mandy返嚟保護大小姐，點知等咗咁耐都等唔到佢回歸嘅消息，反而等到Mandy嘅告別！（小編眼濕濕⋯⋯）

Mandy謝芷倫其後都喺Instagram上傳一張著住律師袍嘅相，並寫道：「今集愛回家講我放左監去左讀法律了，我會盡快學成歸來！我衷心多謝你們每一位的支持。」

而博士馬貫東亦有發文感謝同事同觀眾：「過往三年《愛回家》帶給我許多許多，除了寶貴的演藝經驗，還認識到一班好有愛的『家人』。台前每一位前輩、演員和幕後每一位工作人員的教導、包容、支持和鼓勵令我獲益匪淺，十分感恩。每天努力學習，每天進一小步。今天短暫離開，願在不久的將來會呈現一個更好的馬貫東回來這個家。」

送水輝同池子孝都有貼文留言為博士打氣，池子孝不捨地話：「你係池子孝唯一嘅朋友」，而送水輝則表示：「博士，出去加油呀！等你番黎再送貨！」

Mandy一直都好盡力保護大小姐，而家無咗佢都唔知蓮蓮點算啊～～～～（哭）

Text：GirlsLike Editorial

Photo source：TVB, Instagram