梁家輝：「我太太是世上最好的女人」無視外界對老婆外貌的批評，感激多年共患難的陪伴～

By Aisa on 18 Jan 2019

愛情，除咗可以同甘更要共苦，最真摯嘅愛情係喺最潦倒之際仍能共患難，喺你經歷歲月洗禮後仍能保持彼此間熾熱嘅溫度。而梁家輝同妻子江嘉年，正正就可以演活出最真摯嘅愛情。時光流逝，梁家輝由當年一貧如洗嘅小子變成現今影壇嘅巨星，而老婆江嘉年都由當年嘅美少女變成了中年婦人，但唯一不變嘅係兩人嘅愛情。

Photo from Weibo

唔好睇今日嘅梁家輝咁有成就，佢其實曾經有過一段辛酸嘅日子，佢1984年成為最年輕嘅金像獎影帝，雖然有名但無利，更因為政治因素而被封殺。當時一度要做無牌小販賺取收入，最潦倒嘅時候戶口只得8000蚊，就喺嗰陣時佢遇上電視台監製江嘉年，兩人相戀、結婚，佢甚至連辦婚宴嘅錢都無，只好瞞住父母，喺雙方妹妹見證下註冊結婚。

Photo from Weibo

結婚嘅時候，佢問妻子嫁比自己會唔會覺得委屈，對方回答：「不會，我相信你以後不會讓我傷心。」，佢當時好感動，呢一句話直到今日都一直印喺佢心中，時刻提醒住佢妻子對佢嘅愛同付出。

Photo from Weibo

終於苦盡甘來，成為金馬獎影帝嘅時候，佢喺台上向太太表白：「太太在我最失意、最沒有希望、最窮、最潦倒的時候嫁給我，不管今天還是以後，我拿到榮譽、獎品、獎金、薪水，反正是一切啦，我都要跟她一塊分享。」

Photo from Weibo

1993年，梁家輝同太太一齊去越南拍攝電影《情人》，中途被黑社會挾持到菲律賓拍戲。於是江嘉年挺身而出，佢一個小女人，外型嬌小但為愛毫無懼怕，直接同對方大佬談判：「我既然來了，就不怕死，可我死了，對你們也沒好處。」佢同對方分析梁家輝拍完情人之後一定會名聲大噪，對另一部電影嘅票房有幫助，最後黑幫先釋放咗梁家輝，比佢繼續拍攝《情人》。