47歲康華加入樂壇成2019年新人！佘詩曼有情有義，出錢出力支持好友圓夢～

47歲康華加入樂壇成為2019年樂壇新人，佢曾經喺《流行經典50年》入面演唱《你怎麼捨得我難過》﹐被讚一鳴驚人，其後被唱片公司發掘，早前更推出新歌《拼火花》，仲喺1月17日舉行新歌首播會，期間康華更提及可以成為樂壇新人，其實得到唔少圈中好友支持，就好似阿佘佘詩曼出錢出力幫佢拍攝宣傳海報。

Photo from Weibo

康華接受訪問嘅時候，提到好友阿佘幫忙做攝影指導。阿佘因為覺得康華最初拍攝嘅宣傳照睇落太傷感，所以提議重新影過。不過唱片製作嘅預算有限，阿佘二話不說自己掏荷包，預約攝影團隊、化妝同埋設計師，仲兼任形象指導，無條件為康華重新拍宣傳海報～

Photo from Weibo

康華好感動，佢話：「我不敢問阿佘用了多少錢，但我會送她禮物作回禮，非常珍惜這位好朋友，就算要我赴湯蹈火、做牛做馬都在所不辭，今世做不到下一世都會。」另外，康華仲話歐陽震華、陳煒等好朋友都好支持自己。

Photo from Weibo

康華同阿佘一向感情都好好，就喺康華上年生日上，阿佘相約佢慶祝，仲送咗一份令康華好感動嘅禮物，雖然康華無透露係咩禮物，但佢話慶幸人生可以遇到呢位知心好友，可見二人感情並非一般嘅深～

Photo from Weibo

其實阿佘向來都重情義，對待朋友定係家人，佢都交出一顆真心。阿佘5歲喪父，由媽媽獨力帶大。佢 2005年到北京參加頒獎禮時，遇上媽媽喺美國患重病，因為無法前往探望，而非常內疚，於是決定每個月都抽時間去見媽媽～而佢為咗報答媽媽嘅養育之恩，仲曾經喺母親節時送上一幢三層高嘅村屋同埋名車比媽媽，非常有孝心～

Photo from charmaine_sheh@Instagram

Text：GirlsLike Editorial

Photo Source：Instagram, Weibo