康華為親情甘願放棄愛情！勞心勞力照顧患病雙親，有自理能力的女人，單身也可以很快樂～

最近樂壇好消息，當然要提47歲康華加入成為2019年樂壇新人啦！康華正面樂觀，係一個真正嘅「女漢子」，生活上嘅磨練，令勤奮又孝順嘅佢，擁有一股獨有嘅女性魅力。為咗照顧體弱多病嘅父母，佢慳到將拍劇時未食完嘅飯盒留起當下一餐，甚至甘願放棄感情生活，試問又係唔係每個人都做得到呢？

Photo from Weibo

康華話過《宮心計2深宮計》入面「南宮司設」性格就好似佢一樣有規有矩，感情豐富但就將感情收藏，好清楚自己想要啲咩。現實中嘅佢，最清楚自己需要陪伴體弱多病嘅父母，康華認為人生唔同階段，就要作出唔同取捨，旁人可能會唔明白佢點解唔趁宜家勢頭好多留在內地拍劇、賺多些錢，覺得我浪費了機會。但我深知若不好好珍惜與父母相處，日後定後悔，就算得到所有名利也沒意思。」

康華嘅媽媽患有心臟病，父親眼睛中風，曾經做過「通波仔」手術，為咗慳錢，佢有時拍劇會將未食完嘅飯盒留起當下一餐，或者會拎多個飯盒。雖然醫藥費好貴，但康華覺得錢財只係身外物，父母係佢嘅精神支柱、工作嘅動力。

「他們令我工作如何辛勞都覺得有價值、有滿足感。生存不是為了飲飲食食，況且我一向甚少娛樂，照顧家人就是快樂，辛苦搵錢也是想給父母有好的環境居住，令家人生活愈好、健康愈好，我就最開心。」

為咗照顧家人，康華除咗搏命賺錢，佢仲將感情生活擺到好後，直到宜家佢仍然單身。佢覺得感情要隨緣，唔可以強求，要強求緣份就唔係真正嘅緣份。 除非可以搵到一個同佢一樣有孝心，可以一齊照顧家人，又相處得舒服自在嘅伴侶，否則佢都唔需要：「我既有自理能力，經濟又獨立，一個生活也很幸福。」

雖然身邊不乏追求者，不過大部份年紀都細過佢，想一直專注事業同家庭嘅康華，選擇放棄愛情，即使感情世界暫時都係空白，但佢仍然活得好精彩有意義。

Text: POP-OL Editorial

Photo Source: Pinterest