豪爽女強人霸氣道：我喜歡的東西我自己買！楊紫瓊拍戲嫌道具假，出動逾300萬私伙綠寶戒指！

早前楊紫瓊以一身綠色皮革蕾絲拼接禮服登場，呢件禮服其實早於2015年Met Gala時已經著過，咁有環保意識真係值得一讚。有網民留意到楊紫瓊手上戴住一隻喺電影《我的超豪男友》中入面出現過嘅綠寶石戒指，原來戒指並非廠商贊助，而係楊紫瓊「私伙寶物」。早前接受訪問中仲霸氣咁話，自己鍾意嘅嘢，從來都會自己真金白銀買～女人講得出呢句說話，真係好型～予人感覺女強人之餘，最緊要係個性獨立，雖然平凡人好少會有咁大粒綠寶石戒指，但呢一份靠自己雙手令自己幸福嘅態度真係好值得女生學習！

Photo from michelleyeoh_official @ ig

金球獎過後，楊紫瓊接受訪問，主持人提到大家都係到討論綠寶石戒指。楊紫瓊先笑一笑，表示只係一隻戒指，唔洗大驚小怪。而主持人追問戒指由來時，楊紫瓊就話：「戒指是我的。」又回應：「我不等人送禮物。比如是如果我想要花，我會請花店送來給我。」獨立又霸氣的言論，加上其俠女一樣嘅形象，真係令人拍手叫好。

Photo from michelleyeoh_official @ ig0

楊紫瓊於電影《我的超豪男友》飾演挑剔麻煩外母一角，角色造型都係以女強人同有霸氣見稱。《我的超豪男友》其中一個造型需要綠寶石戒指，但由於資金有限，劇組準備咗一隻「A貨戒指」，重視電影質感嘅楊紫瓊覺得咁樣做太無誠意，拒絕戴「A貨戒指」，主動提出出動「私伙嘢」，於是請助手從自己嘅珠寶盒中搵出一枚自己設計嘅綠寶石戒指用以拍戲使用。

真係大粒到50米外都見到，外界估計價值約300萬，劇組人員真係要打醒12分精神。（笑）

Photo from michelleyeoh_official @ ig

而楊紫瓊事後亦喺社交媒體寫上「Don’t wait for people to make you happy 不要等別人讓你開心。」網友紛紛留言表示認同及稱讚她「帥氣！」、「夠霸氣！」、「做人最緊要令自己開心」等等。講得真好，如果自己都唔愛錫自己，仲邊有能力愛其他人～即使唔係每個平凡女人都有能力同資格擁有一隻綠寶石戒指，但不妨學習楊紫瓊呢種價值觀—善待自己，因為快樂應該源於自己，我哋本人應該比起任何人更愛錫自己！

Text：GirlsLike Editorial

Photo source：Instagram, Youtube