有時過度認真反帶來煩惱！做人學會「少點敏感、多點遲鈍」，才令人生活得更幸福～！

香港人活喺步伐快速、忙碌嘅社會，「遲鈍」依兩個字通常都會係比人一個負面嘅印象。但係有時遲鈍都未必係件壞事，過度敏感嘅人會經常糾結係生活挫折而總係煩惱不斷，久而久之會更容易因此而患上心理疾病。所以人生要能夠減少敏感、多點遲鈍，生活才會更加幸福、充滿活力。

若你同樣係敏感族的話，以下幾點帶你領悟「去敏感」嘅人生道理！

1. 敏感是天賦，不該愛用就用

敏感嘅人較容易勉強自己承受壓力、擔心顧忌，但與其永遠神經質而無所行動，倒不如試下遲鈍一啲，讓生活前進先係上策。

遲鈍並唔係腦袋魯鈍或係對事情嘅感受思考拙劣，而係選擇以寬闊豁達嘅態度坦然面對生命。當你克制過度敏感發作，同時少為無關緊要嘅事情擔心，反而能維持飽滿精神和勇敢生活嘅動力。

2. 常告訴自己：「總會有辦法的」

人生不如意事十常八九，面對住工作、人際關係、戀愛、金錢各方面嘅挫折，敏感嘅人總係會悲觀咁話「我已經唔得啦！」、「我嘅忍耐已經到咗極限啦！」依啲說話。但如果成日都因為煩惱生活中嘅挫折而意志消沉，耐咗就會失去繼續努力嘅鬥志。

縱使人生走來顛簸，就算神經大條、遲鈍一啲，都要永遠樂觀咁同自己講：「只要繼續努力，總會有辦法。」，咁樣就算人生充斥住唔如意嘅事，遲鈍力都能夠使你幸福咁生活落去。

3. 擁抱衰老，不逞強裝年輕

當人年幾愈大，體力、視力、記憶力等身體狀況就會開始衰退。人對於衰老依個事實需要稍微遲鈍、開闊一啲，唔好糾結係年齡嘅增長，有時唔記得嘢都無妨。

即使係體力稍微衰退一點、動作唔似以前咁靈敏，都無必要諗得咁嚴重，白髮多咗幾條、皺紋多咗幾條，都唔需要嘆氣。勇敢面對衰老同時都擁抱年齡嘅增長、減少敏感，即使上咗年紀嘅心靈都能保持年輕。

4. 凡事認真加快衰老

所謂認真，係指對任何事情想得太過嚴肅、想得太鑽牛角尖嘅意思。認真煩惱思慮，只會徒增白髮、增加皺紋，讓體力和精神更衰退。

人生一定有煩惱，有時甚至必須經歷痛苦，但最重要嘅係，無論你係煩惱纏身或係經歷痛苦，都要記得以遲鈍、輕鬆嘅心態面對，凡事唔好諗得太認真，唔理到咗幾歲，都一定可以朝氣勃勃咁享受人生。

5. 認真已經成了一種災難

過度認真其實係一種災難。依類型嘅人最大嘅特徵就係自貶身價，總係用最嚴格嘅標準批判自己，認為「自己還不夠努力，對這個世界一點貢獻都沒有，真是沒用。」。

而事實上，並無一個人對社會嘅貢獻係滿分，因此佢哋永遠無法對自己感到滿意。要識得用鈍感力面對生活，唔洗用高標準去審視自己，先能夠用輕鬆嘅心情幸福過每一日。

6. 與其藏拙不如獻醜

有啲人唔敢讓別人睇到自己嘅弱點，擔心會被對方睇唔起、輕蔑，因此明明缺乏信心，但卻總係裝腔作態：「這種事對我而言，根本小事一樁。」、「我一點都不會覺得自卑。因為我不是那麼軟弱的人。」。

但事實上，佢哋嘅內心相當自卑，成日擔心弱點曝光都會令心情苦悶，所以不如老實接受、暴露自己嘅弱點，比大家睇到真正嘅自己，勇於面對不足和努力學習，先能夠自在、坦然面對生活。

Text：GirlsLike Editorial

Photo Source：Instagram