有望超越最長劇集《真情》！深受觀眾喜愛獲超高收視，《愛・回家》慶功宴宣佈添食200多集～！

大台8點檔情境喜劇《愛・回家之開心速遞》深愛觀眾歡迎，成為近年最「入屋」嘅劇集，更被網民封為「TVB最高質劇集」，一班忠實粉絲每晚都要趕返屋企睇～而日前亦迎來一個令人振奮嘅消息，就係《愛・回家》會添食200多集，令觀眾繼續可以電視撈飯！

《愛・回家》喺2018年11月27號播出一集嘅7日跨平台收視高達29.9點，成為2018年單集收視冠軍！而於元旦當日播出嘅一集收點更有30.5點，即係有差唔多2百萬觀眾收睇，獲得如此佳績，大台特地於電視城舉辦慶功宴盛開22圍，一眾演員包括劉丹、羅樂林、林淑敏、單立文、滕麗名、呂慧儀、許家傑、歐瑞偉、樊亦敏、李偉健等都有出席，場面非常熱鬧！

劉丹更開心地表示希望可以超越大台「最長命劇集」《真情》　：「《真情》的集數總共播了1128集，所以《開心速遞》的目標應該是1129集，最好當然1129集之後都繼續播啦！不過都要珍姐（曾勵珍）點頭。」

聽到丹爺嘅願望，珍姐亦點頭支持並大讚台前幕後嘅齊心合作精神：「要邁向《真情》1128集，我不覺得有難度。」

隨後大台立即宣佈《愛・回家之開心速遞》暫時將會拍到720集，即會加拍約200集，按照觀眾咁熱烈嘅喜愛程度，睇嚟要《真情》成為最長命處境劇指日可待呢～！

《愛・回家》捧紅咗唔少演員，其中最具代表性嘅就係飾演大小姐龍力蓮嘅林淑敏，佢更憑呢個角色成功奪得《萬千星輝頒獎禮2018》「最佳女配角」，兼且獲大台轉「親生女」合約！

其餘角色如送水輝、KC、Terry、熊若水等等都十分入屋，加上高質劇本「IT狗」同「飯托Karen」等等都獲得觀眾盛讚，相信今次加集很多粉絲都會好支持！

Text：GirlsLike Editorial

Photo source：Instagram