尋回失聯25年的工人姐姐！與阿sa小時候形影不離，感激她曾付出的青春與愛～

蔡卓妍（阿Sa）最近就喺社交平台上分享一件開心事，話佢搵番失去聯絡25年嘅工人姐姐Eden。經過多年，最近阿Sa爸爸終於搵到佢，原來Eden再番嚟香港工作，咁多年無見，一見面大家都熱淚盈眶。阿Sa好感謝上天比佢見得番Eden， 仲話自己會喺以後嘅日子，報答佢曾經付出嘅青春同愛～

Photo from choisaaaa@Instagram

阿Sa同呢位菲律賓工人姐姐感情深厚，佢話Eden係佢人生中其中一位好重要嘅人～由佢2歳開始照顧佢到小學3年級，經過咁多年，Eden話自己雖然換過好多銀包，但係裡面依然係放住佢細個時候嘅相片。

Photo from choisaaaa@Instagram

阿Sa話自己細個嘅時候，爸爸媽媽都要為養家而忙於每日嘅工作，佢地家境唔算富裕，但爸爸媽媽仍然比佢最好嘅生活，仲令佢可以認識到Eden姐姐。工人姐姐喺佢細細個嘅時候，一直陪伴佢，兩人甚至剪咗一樣嘅髮型，Eden又會陪阿Sa去公園玩，阿Sa又會陪佢去屋企附近嘅美容店做facial～一齊睇電視、一齊唱歌 、一齊祈禱，度過快樂嘅時光。

Photo from choisaaaa@Instagram

工人姐姐仲會用佢嘅工資請阿Sa食零食，又會買小禮物比佢，有時阿Sa嘅爸爸媽媽星期日要加班， Eden姐姐都會帶埋佢一齊去參加同朋友嘅假期活動，呢整段時期佢地都一直形影不離，直至Eden要番去菲律賓～

Photo from choisaaaa@Instagram

但阿Sa話因為當時，無手提電話、電腦，又唔會Send e-mail，要保持聯絡唔係容易嘅事。不過緣份最終都令佢地重遇，阿Sa話見番Eden嘅感覺就好似見到一個好耐無見嘅親人，佢好感謝上天比佢再見到Eden， 以後嘅日子佢話會報答工人姐姐為佢付出過嘅青春同愛～當一個人有名有利，都唔好忘記曾經對過你好，為你付出過嘅人呀，因為無佢地，就無今日嘅你～

Photo from choisaaaa@Instagram

Text Editorial：GirlsLike Editorial

Photo Source：Instagram