陳豪：老婆和孩子令我的人生變得完美～圈中最恩愛的一對，婚後甜蜜度有增無減！
圈中出哂名幸福嘅家庭，當然要提到陳豪（阿Mo）同埋陳茵媺（Aimee）啦！Aimee婚後先後誕下兩仔一女，佢曾經透露有意想追第四胎，最近有指Aimee去婦產科檢查，盛傳佢成功懷孕，不過陳豪就立即否認傳聞，話自己有3個就已經夠哂數！陳豪係好多女性眼中嘅男神，唔單止外表有型、身材健碩、比人感覺誠懇之外，更重要係佢係一個好男人。尤其係宜家做咗爸爸，就更加溫柔，照顧得屋企人好好！同老婆陳茵媺結婚多年，即使工作幾忙，都仍然會搵時間同老婆拍拖，多年來依然如熱戀般甜蜜。
Photo from Instagram
# 甘願為老婆分擔家務
有別於好多男人，阿Mo好樂意分擔照顧小朋友嘅責任，而且佢對於自己湊仔嘅能力非常有自信，話自己應付自如，而且仲好享受呢件事。
Photo from Instagram
養育3個小朋友開支一定好大，早前有指阿Mo為咗方便囝囝到半山返學，就由大埔比華利山搬到南灣豪宅，月租7萬，絕對係一個唔細嘅負擔，阿Mo曾經講過：「小朋友不見爸爸3、4個月就可以，不見媽媽太久不行，若父母一起不見更大件事，這些辛苦工作讓我來頂，太太不要捱得太辛苦。」為咗比囝囡同老婆最好嘅生活，阿Mo只好更努力工作！
Photo from Instagram
而佢之所以可以咁安心在外工作，就全靠Aimee願意將全部嘅時間投放落家庭上，而且將三個囝囡都照顧得好好，等阿Mo可以專心拼搏賺錢，唔洗擔心屋企。Aimee婚後幾乎已經無工作，只會出席時間短嘅公開活動，其實佢有透露過想復出拍劇，不過為咗家庭，唯有將自己嘅興趣暫時擱置，等到囡囡都開始番學， 先再考慮安排工作。
Photo from Instagram
# 珍惜與家人相處的時間
榮升做爸爸之後，陳豪笑容比以往更多，幸福感經常流露面上。好多人話兩夫婦總有一個「嚴」，一個「慈」，而陳豪佢話自己係有時嚴謹，有時寬鬆，佢覺得太鬆或者太緊都唔好，最重要係要比子女感受到爸爸對佢地嘅愛錫，做得好就會獎勵佢地，做錯就會罰。
Photo from Instagram
陳豪平時成日忙於工作，但佢都好著注平時同子女嘅相處，因為佢地鐘意睇動畫，所以佢會帶佢地去戲院睇戲，都會抽時間同佢地踩單車同埋游水～亦都成日有報導指佢會親自帶囝囡番學，凡事親力親為！
Photo from Instagram
阿Mo婚後大大減少應酬活動，而目的就係盡量將僅餘嘅時間放哂落家庭，除咗幫忙分擔太太嘅辛勞，佢亦盡可能唔想錯過仔女嘅成長：「作為父親, 沒有什麼能夠比兒女們相親相愛, 和睦共處來得更加窩心。」
Photo from Instagram
# 適時二人世界 保持甜蜜的溫度
婚後雖然要忙於照顧家庭，將大部分時間都花喺3個囝囡身上，但阿Mo同Aimee仍然會抽時間享受二人世界。阿Mo曾經講過心痛老婆湊仔辛苦，所以一得閒就會同Aimee去拍拖，暫時放低三個仔囝囡，以慰勞佢平日嘅辛勞。
Photo from Instagram
早前Aimee一個人帶住3個小朋友番加拿大探親，一啲都唔輕易～等到佢地番香港之後，阿Mo仲到機場接機，一見到老婆，就立即嘴對嘴錫啖老婆，再逐一錫兩個囝囝同囡囡，之後佢就帶Aimee先去食下午茶，再睇電影，享受甜蜜時光。除此之外，阿Mo同Aimee仲約定每年去一次二人世界旅行，暫時放下幾位小朋友，渡過浪漫又甜蜜嘅時光。
Photo from Instagram
阿Mo和Aimee自從相戀後，總係以最恩愛嘅姿態示人，出席活動嘅時候一定要手拖手，私下吃飯拍拖，都係癡實對方，難怪被公認係圈中最甜蜜嘅一對啦！阿Mo話：「Aimee是我的天使，非常美好、陽光、開心、充滿愛。她和孩子令我的人生變得完美，他們的出生就像煙花，在我的人生裏逐一逐一的綻放，非常美麗。」希望佢地可以一直恩愛落去啦～
Photo from Instagram
Text：GirlsLike Editorial
Photo Source：Instagram
