毛舜筠經歷3段婚姻，體會夫妻最重要是包容！快踏入60歲，下個目標是學習更多語言～

By Aisa on 01 Feb 2019

一個追逐夢想的女生，深信未來是屬於相信心中美夢的人。

毛姐毛舜筠嘅演技一直都被公認出眾，今次佢喺賀歲片《你咪理，我愛你！》入面更首度挑戰歌舞片，仲會一次過飾演4個唔同嘅角色，表現愛情嘅唔同階段。經歷過3段婚姻嘅毛舜筠，同現任丈夫區丁平已經結婚近25年，宜家幸福美滿嘅毛姐對於兩性相處有好多體會。

Photo from moje115@Instagram

由王祖藍執導嘅歌舞片《你咪理，我愛你！》改編自百老匯舞台劇，由12個關於唔同人生階段嘅愛情同婚姻故事串連而成，而毛姐喺其中4個單元入面分別飾演金龜中女、催婚阿媽、性生活不和諧嘅索償律師同埋失婚怨婦，聽落都覺得好有挑戰性。

Photo from moje115@Instagram

戲中一個單元，毛姐飾演一位催婚媽媽，同凌文龍再度合演母子～而現實中有一對23歲同18歲囡囡嘅毛姐就話無呢個想法︰「我一路拍都很奇怪，點解個角色咁恨個仔快一點結婚？可能和丈夫都無這個諗法，有時還希望兩個女不要太快結婚，情願她們多點在自己身邊。」

Photo from moje115@Instagram

事實中，毛姐同兩個女嘅感情好好，佢話同囡囡就好似朋友咁相處，關於生活上嘅大小事都會一齊傾，而且好享受一齊去shopping、一家四口去旅行等時光。毛姐話教養兩個女嘅重點係自小就比佢地好多愛同肯定，等佢地可以建立自信：「我們是基督徒家庭，要教的事情在她們20幾歲前已教過了。現在就視乎她們如何做一個負責任、能夠愛人的人。需要傾訴時，她們也會找父母，所以我們都不會太擔心她們。」

Photo from moje115@Instagram

至於喺婚姻上嘅體會，毛姐同第三任丈夫區丁平結婚就快25年，佢覺得：「當兩個人初認識時，是因為不了解對方，可能只是被某樣特質吸引住，到生活在一起時，真實的一面會好易暴露出來。你可能話對方令到你失望，但同時，自己也一樣予人這樣的感覺，我覺得這是永恒。」

Photo from moje115@Instagram

毛姐覺得夫妻相處最重要係學習彼此包容同接納，佢並無要求另一半作出改變，反而自己會不斷求進。因為老公鐘意買包裝精美嘅曲奇食，觸發佢用靚材料去研製曲奇嘅想法，由以前唔識下廚，到宜家完成法國藍帶課程，2018年12月仲同夥伴合作開曲奇餅店MM+f bakery culture，背後嘅動力係源於佢對家人嘅愛！

Photo from moje115@Instagram

將要踏入60嘅毛姐，依然充滿幹勁，佢下個目標係想學多啲語言，而且特別想學好法文同日文。不過佢話自己記憶力不如從前，以前一日就學識嘅野，宜家可能一個月都未得，令佢感慨︰「我後生時不懂珍惜，浪費了不少時間去拍拖這些無聊的事上，現在回想覺得真是很浪費時間。」佢勸勉年輕人一定要珍惜時光，趁年輕多學習新事物！