林依晨拍戲為演乞丐，親身到台北車站體驗「行乞」！網民：難怪會紅！

林依晨曾經兩度拿下金鐘獎視后，演技同實力相信無人會質疑！而成功背後，全靠林依晨一直嘅努力，佢係圈中出名拼命嘅女藝人，曾經為咗拍戲而6日6夜唔休息～最近佢又再出現令人不得不佩服嘅行為，喺大陸熱播嘅古裝劇《小女花不棄》入面，為咗詮釋乞丐，佢索性走去台北車站附近親身「行乞」體驗，敬業嘅程度令網民都好敬佩，紛紛表示：「難怪會紅！」

最近大陸熱播古裝偶像劇《小女花不棄》，由林依晨、張彬彬主演。該劇討論度相當高，播出只係短短6日就已經突破百萬流量，刷新2018年中9日破百萬嘅紀錄～

林依晨喺《小女花不棄》入面飾演乞丐，完全顛覆佢以往嘅女神形象，蓬頭垢面、隨時都瞓喺地下，毫無形象咁食野。為咗要揣摩乞丐呢個角色，林依晨透露：「我有去台北車站附近的溼地扮演乞丐。」呢一個舉動實在令人佩服～

當時佢穿著破爛嘅衣服，將自己整到污糟邋遢，想藉此感受同平時唔一樣嘅生活。而「行乞」期間，佢仲遇到一個老太太分享經驗比佢：「手要伸高一點人家才看得到你」令佢真正體會到行乞嘅辛苦。

經過呢次體驗，佢有所感受：「可能我們一般人正常人都會不自覺地用衣著來判斷一個人，就直接就認定他是什麼樣的社會階層，而選擇靠近或遠離，這方式是讓我感受很深刻的事情。」

而林依晨嘅努力都受到業內工作人員大讚，有同佢合作過嘅導演提過：「她的劇本永遠都是比別人更豐富的。上面有畫了很多線，做了很多筆記，對於每一個細節都很講究，並且深刻了解，就連每一個口氣，她其實都做得很精準到位。」呢一種認真，實在唔係每個人都做得到～佢咁多作品都獲得好評係有原因嘅，網民都忍唔住讚嘆：「難怪會紅！」。

Text : Girls editorial
Photo source : Weibo