出道15年演技獲肯定！李施嬅入圍「加拿大奧斯卡」最佳女配角，試鏡憑實力打敗過百位女演員！

By Aisa on 12 Feb 2019

李施嬅在法證先鋒4演出大獲好評，令人留下深刻印象。其實李施嬅嘅演技早已獲得肯定，佢唔止喺本地有出色嘅表現，而且更衝出國際，日前憑住加拿大劇集《Blood And Water》第三季中嘅亮眼表現，獲提名《加拿大影視獎》（Canadian Screen Awards）最佳女配角，呢個頒獎典禮更被稱為「加拿大奧斯卡」，今次李施嬅真係揚威國際，為香港人增光呀！～

Photo from selenaleelalee@Instagram

李施嬅於上星期五（8日）喺佢嘅Instagram上，同Fans分享一則喜訊，指自己起床後收到電郵通知，喺加拿大一年一度最重視嘅頒獎禮《Canadian Screen Awards》中憑劇集《Blood And Water》中Michelle一角，提名最佳女配角，佢喺片入面全程都笑得好開心，可見呢一份肯定令李施嬅有幾咁興奮，佢亦好謙虛咁話：「無論結果係點我都會好開心，我覺得好榮幸，因為被提名已經係一件好難得嘅事，好興奮呀！」

Photo from selenaleelalee@Instagram

Selena曾經參與過好多劇集，演技一直備受好評，雖然試過多次入圍「最佳女配角」，只可惜一直都未能獲得任何獎項。一次機緣巧合下，佢自薦出演美國微電影《Once More》，並於前年成功奪得《European Cinematography Awards》同埋《Los Angeles Film Awards》最佳女主角，成為雙料影后，能力正式獲得肯定～

Photo from selenaleelalee@Instagram

李施嬅今次憑住警匪劇《Blood And Water》入面飾演嘅女殺手Michelle入圍～李施嬅對演戲非常認真，每次演出都會做好100分準備！而今次佢更刻意減磅，並且接受槍械訓練，令自己可以更符合角色設定～其實呢個角色得來不易，當時李施嬅喺試鏡嘅時候打敗過百位女演員成功奪得，實力不容小覷！

Photo from selenaleelalee@Instagram

之前李施嬅喺節目《胡說八道真情假期》入面都曾經真情剖白，指見住身邊好姊妹都拎過獎，但自己仍然一個獎都未得到過，覺得好氣餒，都懷疑過自己係唔係演技未到家，不過之後得知獲得《European Cinematography Awards》最佳女主角後，奪得第一個獎項，覺得非常感恩：「我做咗咁多年，年年都有去頒獎禮，睇人攞獎攞得多，今次有呢個機會，可以講返得獎感受，原來真係好鬼死緊張！」