黃澤鋒：深深體會母愛偉大！囡囡未出世就先計劃未來，52歲太太7月預產期～

By Aisa on 12 Feb 2019

前TVB藝人黃澤鋒上個月就公布52歲太太有喜，兩人準備要做「豬BB」父母～黃太52歲懷孕屬於高齡產婦，身為老公嘅黃澤鋒亦體會到太太懷孕犠性好大，深受感動。而佢更早早為囡囡做好準備，BB都未出世，佢就已經為家人計劃將來，預備幫小朋友買保險留待升學之用，咁識得為家人著想，果然係好爸爸好老公～

Photo from 黃澤鋒@Weibo

黃澤鋒同太太陳麗麗上月宣布懷孕，黃澤鋒早前透露老婆宜家已經懷孕4個月，而且已經知道BB係女仔，預產期係今年7月。黃澤鋒指自己宜家都好似有咗4個月身孕咁，日日心情都唔一樣，所以完全可以諗到老婆大肚有幾辛苦，佢仲話：「我試過睡覺時不小心用拳頭打向太大，聽到她大叫，把我嚇死，現在只敢睡在一邊。」

Photo from 黃澤鋒@Weibo

黃澤鋒又透露希望可以賺多啲錢，為家人計劃將來，雖然自己以往無買開保險，但會考慮日後為小朋友買，將來就算有咩事，囡囡都可以升讀大學。可能因為黃澤鋒後生嘅時候曾經係運動員，佢都希望個女日後可以做運動員。

Photo from 黃澤鋒@Weibo

至於黃太，佢已經52歲，知道自己屬於高齡產婦，佢指自己凡事會小心，尤其會戒口，希望囡囡可以喺健康嘅情況下出世～黃澤鋒仲透露當年佢媽媽都係40幾歲先生佢，所以佢深深體會到母愛嘅偉大。

Photo from 黃澤鋒@Weibo

原來黃澤鋒後生嘅時候曾經係港隊泳將，而且1981至85年期間多次贏取香港渡海泳冠軍，不過因為對演藝事業有興趣，所以投身TVB做藝人，只可惜演藝事業並唔係咁順利，多次遇到挫折～大概40歲嘅時候黃澤鋒生活重新起步，2009年佢認咗太太，喺老婆嘅支持下，佢重拾舊日武術同游水嘅技能，並考獲教練牌照，於2014年約滿離開無綫，宜家佢主力教小朋友打泰拳同埋游水～

Photo from 黃澤鋒@Weibo

黃澤鋒曾經話過同太太初初相識，就已經認定大家係終身伴侶，所以拍拖一年閃婚，結婚後佢覺得自己成個人都變得更有承擔。今年係佢地結婚第9年，太太懷孕嘅喜訊令佢地又驚又喜，感恩可以喺呢個年齡做父母嘅同時，亦明白到太太年紀已經唔細，喺呢個時候懷孕嘅犧牲好大。需要係辛苦，但黃太認為有小朋友嘅婚姻先係完滿家庭，所以佢將呢件事當成一個考驗，迎向美滿幸福嘅生活～！