《新喜劇之王》鄂靖文入行8年寂寂無聞，從未放棄追夢～終被星爺欽點做女主角！

By Aisa on 13 Feb 2019

講到最近有咩戲睇，一定會提到《新喜劇之王》～戲中女主角鄂靖文，其實係第一次做電影女主角，喺戲入面表現出色，唔少觀眾都大讚佢演技出眾！其實星爺周星馳一向都鐘意捧新人，而且獨具慧眼，曾經捧紅過《功夫》黃聖依、《長江7號》徐嬌同張雨綺、《美人魚》林允，仲有當然唔少得1999年《喜劇之王》入面嘅張栢芝啦！

Photo from 《新喜劇之王》劇照

而今次鄂靖文喺《新喜劇之王》入面飾演嘅角色同現實中嘅佢好相似，都係為夢想而奮鬥。即將踏入30歲嘅鄂靖文，2010於中央戲劇學院表演系畢業～之後佢喺煤礦文工團工作，為咗成為演員，佢辭職北漂當臨時演員，不斷爭取演出機會。直到2014年參加湖北衛視喜劇類選秀節目《我為喜劇狂》第一季，奪得冠軍，努力終於得到回報，之後佢主要喺網絡電影上面演女配角。

Photo from 鄂靖文@Weibo

而今次佢喺《新喜劇之王》入面飾演嘅角色如夢，為理想奮鬥嘅心根本就係描繪緊現實中嘅佢，鄂靖文話過：「我的角色如夢與自己有很多相似之處，好像性格方面，被嘲笑挖苦也覺得沒所謂，生活中我也是這樣。」

Photo from 《新喜劇之王》劇照

因為熱愛演出，所以佢參加過唔少節目，除咗剛剛提到嘅《我為喜劇狂》外，佢2016年參加過內地喜劇選秀節目《笑傲江湖》、2017年參加東方衛視嘅喜劇素人綜藝節目《笑聲傳奇》等。

Photo from 鄂靖文@Weibo

當時佢收到副導演電話，通知佢被選中主演《新喜劇之王》，一開始佢唔敢相信：「副導演總共打了3次電話，給我看了微信截圖後我才相信，一開始以為是詐騙。」最後當上周星馳電影主角，佢非常感恩，自畢業後佢努力打拼，尋找機會，堅持唔放棄無轉行先有今日嘅機會。人生如電影，鄂靖文憑住打不死精神，最終如願成為女主角，得到期待已久嘅黃金機會。