他就是真正的巨星！奇洛李維斯捐70%片酬助白血病者，一生坎坷經歷女友去逝、孩子夭折～

By Aisa on 13 Feb 2019

一個追逐夢想的女生，深信未來是屬於相信心中美夢的人。

荷里活男星奇洛李維斯（Keanu Reeves）嘅新片《殺神3》即將於5月上映，呢位男神作為巨星但一直好低調，生活簡樸，唔奢侈，平日出門都以電單車同地鐵代步，而佢好有善心，經常低調行善捐錢到慈善機構，仲曾經捐出《廿二世紀殺人網絡》70％片酬比白血病患者，佢認為可以將財富分享比有需要嘅人係一件樂事！

Photo from Pinterest

奇洛李維斯雖然早就成名，但佢一路走來並不容易～佢童年生長喺有問題嘅家庭，媽媽曾經做過脫衣舞女郎，佢12歲嘅時候，爸爸涉嫌販賣毒品，後來父母離婚。

Photo from Keanu Reeves

一直到1990年奇洛李維斯先開始成名，當時就遇上佢嘅一生摯愛Jennifer Syme，兩人展開長達8年嘅戀情，女友1998年懷孕，不過最後個小朋友夭折，兩人非常傷心，Jennifer失去孩子嘅18個月後，都不幸因車禍死亡。

Photo from Pinterest

痛失最愛後，奇洛李維斯一直單身，至今唯一承認嘅女友就只有Jennifer，事隔多年佢仍然對Jennifer 同佢地嘅孩子念念不忘：「我到現在還在想着，如果Jennifer和那個孩子都沒有死，我們現在該有多麼幸福。我有時急了就想罵人，因為上帝對我太不公平了。」

Photo from Pinterest

同年，佢嘅妹妹Kim Reeves證實患上白血病，佢同妹妹相依為命多年，為咗照顧妹妹，佢更一度考慮息影，幸好最後妹妹成功戰勝病魔。亦因為咁，奇洛李維斯決定將《廿二世紀殺人網絡》（Matrix）嘅70%片酬捐去白血病機構，幫助有需要嘅病人。

Photo from Pinterest

佢熱心助人，但非常低調，唔會四處宣揚，唯一一次喺2009年，佢透露過早於5、6年前就設立咗基金會，為數個兒童病院以及癌症機構作出援助，但未有透露機構名字同埋捐款數目。因為佢唔想自己個名同機構掛勾，而機構本身都唔需要任何宣傳，佢只想幫助有需要嘅人，不求回報：「金錢是我最不在乎的東西，現在的財富應該足夠讓我活好幾個世紀。」「也許你需要快樂的生活，但我不需要。」

Photo from Pinterest

奇洛李維斯生活一向簡單樸素，仲成日被影到喺住所附近嘅公園自己一個人食麵包，佢仲會同流浪漢分享食物：「我想要甚麼隨時都有，為何還要間空房子？」「我的私生活其實十分沉悶，不過有工作會好些。」

Photo from Pinterest

苦澀嘅人生經歷令奇洛李維斯甘願過住簡單嘅生活，亦令佢擁有一顆謙卑善良嘅心。亦因為咁佢得到眾人嘅尊敬，網民們都大讚奇洛李維斯：「佢先係真正既明星」、「真正好心人」、「人嘅外貌會隨年紀而改變，但內在修為卻不會。奇洛，真正美麗之人莫過於此」、「荷李活有Keanu Reeves，香港有個古天樂，都係內心同外表一樣咁Charm的美男」