做足23年被TVB減3份1人工！蓋世寶試過9個月無工開，如今宣布離巢：擦鞋呢場戲我做唔到。

陪伴住80後、90後細路仔長大嘅兒童節目，隨口都講得出幾個—《閃電傳真機》、《至Net小人類》、《放學ICU》......以前香港地小朋友放學就係趕住番屋企「電視汁撈飯」，邊做功課邊睇兒童節目，相信80後、90後特別有共鳴～節目主持更加係小朋友心目中嘅天王巨星！隨住年代改變，2015年開始，TVB將兒童節目進行大改革，舊有班底完全撤換，「LuLu姐姐」蓋世寶近日正式宣布離開工作23年嘅TVB，唔少自細電視汁撈飯嘅網民可憐蓋世寶事業上遭遇，支持佢離巢決定～

細個一心要加入娛樂圈嘅蓋世寶於1996年加入TVB第八期藝員進修班，同大部分人一樣，畢業後由低做起，被派到兒童節目《閃電傳真機》做主持，一做就做咗23年。

比較唔幸運嘅係，當年同樣做兒童節目出身嘅演員都向發展個人演藝事業，各奔前程，比如係譚玉瑛拍住李家鼎主持嘅《阿爺廚房》，人氣急升；麥長青、黃智賢轉戰戲劇組後，紛紛成為實力派演員；黎芷珊曾變成金牌司儀，蓋世寶一直留守兒童節目組，由《閃電傳真機》、《至Net小人類》到《放學ICU》都有佢嘅身影。

但2015年開始，TVB將兒童節目進行大改革，班底需要重新調整，自言性格「唔識擦鞋」嘅蓋世寶，由與世無爭嘅「兒童世界」跳至殘酷、現實嘅「成年人世界」，蓋世寶深知自己不懂世故嘅性格「已經決定某啲嘢」。

被調往戲劇組後，蓋世寶曝光率同工作量也大大減少，佢笑言「啲人已經以為我無做」。

蓋世寶調組後，接嘅角色無發揮空間，的確，早前大熱劇集《BB來了》中，佢只有一句對白，可謂比「騎喱啡」更無存在感。尚未開播嘅新劇《她。她。她的少女時代》係佢最後一部接拍嘅電視劇，當中只有

一、兩場戲，蓋世寶苦笑形容「仲差過啱啱訓練班出嚟」。

上年雖曾獲派做《一周八爪魚》主持，可惜做咗9個月，節目又遭煞停，蓋世寶更透露試過連續九個月無接到工作！

二月底即將跟TVB約滿嘅蓋世寶，曾經同公司討論過續約問題，但公司基於佢「表現不佳」嘅成績表，提出要減1/3人工，蓋世寶透露人工幾多時，忍䀲話：「你當係一萬頭～」於是佢決定唔再續約，領取長期服務金後，離開效忠了23年嘅TVB！

離巢後，蓋世寶尚未諗好未來發展方向，但佢開朗表示：「香港唔會餓死人，只要你肯做，所以我從來都無擔心過。」網民都紛紛留言支持蓋世寶，讚揚佢笑容燦爛，希望佢將來能夠發展所長吧～

Text：GirlsLike Editorial

Photo Source：Sina