情人節心意比物質更重要！張繼聰海旁彈結他獻唱冧謝安琪，甜蜜示愛：每天愛你多一些～！
昨日情人節（2月14日)大家都忙住同愛人歡渡佳節，對女仔嚟講情人節節目當然唔少得食飯睇戲，同收到另一半為你悉心準備嘅禮物，不過對好多女仔而言，一份禮物最最最重要當然係心意啦～而今年謝安琪（Kay）就收到老公張繼聰最有心思嘅禮物——就係親自喺尖沙咀海旁為佢彈結他獻唱，冧爆太太！
昨晚張繼聰於Instagram分享咗一段彈結他唱歌片，佢喺尖沙咀海旁一邊彈住結他一邊唱《每天愛你多一些》，而太太Kay就同一大班觀眾企喺對面欣賞表演，Kay睇住老公為自己公開獻唱，甜蜜嘅笑容馬上浮現臉上～！
張繼聰留言：「老婆話唔要d物質禮物，但係要難忘嘅冧豬嘅幾十年後都記得嘅，於是我帶佢去海旁，問班年輕人借咗d架生......」「講都無人信，仲要撞到Endy同阿嫂，氹老婆嘅嘢，梗係搵啲志同道合嘅人一齊啦（主要係互相拍片）P.S.十分感謝借樂器比我地嘅年輕人s，打攪晒」
然後佢仲Tag埋老婆嘅Instagram，用Hashtag同老婆甜蜜示愛：「最後最後 #每天愛你多一些 #HappyValentinesDay」嘩～～小編都覺得冧爆啊！
張繼聰同Kay咁啱得咁橋喺海旁撞到周國賢同太太，於是兩人都紛紛落場為另一半開唱，周國賢仲為老婆獻唱情歌《目黑》，誓要將老婆冧爆！
片段公開後立即引來網民狂讚：「要一直幸福落去」、「好正好有心思」、「屈曬機」、「呢啲老公真係去邊度搵」、「又靚仔又大隻又識彈又識唱仲要好聽，比條生路嚟行下好嘛」大家都狂讚張繼聰同周國賢係好老公，好識做！
兩人結婚12年經歷高低風浪，張繼聰多年來一直用心守護太太Kay，份人又隨和又幽默，咁樣嘅男人實在太完美啦！
Text：GirlsLike Editorial
Photo source：IG
