《火速救兵IV》歐錦棠左手負傷，仍堅持高空危險拍攝！被網友大讚演魔鬼教官入型入格～

By Aisa on 23 Oct 2018

一個追逐夢想的女生，深信未來是屬於相信心中美夢的人。

身為演員，最大成就莫過於係得再觀眾嘅認同，歐錦棠參演與過唔少劇集演出，一直以來用心做好每一個角色，每一個演出佢都好珍惜。而最近同香港電台、消防處共同製作嘅劇集《火速救兵IV》掀起熱話，網友們都大讚節目製作認真，無論係劇本安排、演員表現同埋場面調度上面都比好多電影出色，當中長達3分32秒一Take過長鏡頭，更係令觀眾們印象深刻～此外，演員更親身上陣拍攝危險動作戲，非常專業，而劇中有唔少資深演員參演，歐錦棠所飾演嘅魔鬼消防教官，更被網友大讚表現精彩～！

Photo from 《火速救兵IV》

《火速救兵IV》首兩集主題係「火伴」，講述消防員雖然係救火英雄，不過都係有血有肉嘅人，喺火場入面奮勇救人唔能夠單靠一人之力，喺火場入面無人可以獨自成為英雄，一定要靠團隊合作，互相守護，先會成功～

Photo from 《火速救兵IV》

而喺劇入面，歐錦棠原本係前線消防員王sir，一次行動期間，因為火場發生爆炸，令佢險＝差啲墜樓，佢嘅同僚為咗捉住佢而被嚴重燒傷，呢次意外令佢決心要教導學員守護同伴嘅重要性。其後，王sir就被調職到消防訓練學院擔任教官，看似無情又無理嘅佢更被稱為「爆人王」。

Photo from 《火速救兵IV》

其實除咗消防局長鏡頭一幕之外，講述歐錦棠喺公共屋邨被炸飛，於大廈外命懸一線嘅一幕都非常精彩！鏡頭入面，佢單靠臂力捉實欄杆，而何華超就忍受住背後烈火，搏命將戰友拉番上嚟，好多觀眾都大讚刺激。呢一幕係喺13樓上拍攝，就算已經有吊「威吔」，但都係相當危險，當初導演同埋製作單位提議喺1樓進行拍攝，再以後期特技處理，但歐錦棠拒絕呢個安排，因為佢覺得咁樣會令劇集失真。

Photo from 《火速救兵IV》

不過，其實歐錦棠上年9月喺音樂劇《馬丁路德》演出中途左手意外甩骹，所以今年年初拍攝呢一幕單靠臂力捉實欄杆嘅時候，佢嘅左手傷患仍然處於康復當中：「當時左手算係可以活動，但唔能夠百分百伸直，啲關節都係會痛，用唔到太多力。不過，我現場堪察過，如果用右手捉欄杆，就會拍得唔夠靚，大環境淨係會影到棟樓，用左手就會拍到城門河同遠處嘅獅子山，所以幾危險、幾辛苦都覺得要盡量做。」佢仲指出最恐怖嘅其實係背後氧氣樽嘅重量比想像重好多，令佢被炸飛嘅時候翻咗一個預期外嘅筋斗。