《愛回家》大小姐林淑敏乳癌康復,丈夫不離不棄拒絕分手,不讓她冒險停藥生BB~

《愛回家》大小姐林淑敏乳癌康復,丈夫不離不棄拒絕分手,不讓她冒險停藥生BB~

Hot Topics
By Aisa on 18 Feb 2019

42歲嘅林淑敏近年就因為喺《愛‧回家之開心速遞》入面演出「大小姐」而大受歡迎,上年台慶頒獎禮佢更憑住呢個角色奪得萬千星輝最佳女配角。不過今日嘅成績其實得來不易,入行19年,佢曾經演過一啲唔太起眼嘅角色,收入只係剛好夠糊口,2010年嘅時候佢確診患上第2期乳癌,幸得當時仲係男朋友嘅老公陪伴,最終戰勝病魔,得到今日幸福嘅生活~

Photo from sukman_lam@Instagram

 

大小姐憶述抗癌經過,佢指當時成個人好沉重,由檢查、通知到做手術,成個過程都好快,只係3、4日內就完成。本來醫生話大小姐可能唔洗化療,但係因為佢嘅Cancer係最惡嗰種,最後佢唔單止要化療,仲要打標靶藥。但因為林淑敏有信仰,佢一邊祈禱,一邊消化呢件事,最後佢覺得要將所有治療做哂,否則自己就會後悔。

Photo from sukman_lam@Instagram

喺整個過程中,佢最感激嘅就係佢當時男朋友,即係宜家嘅老公陳中原對佢不離不棄,用心照顧:「記得當時他不太識煮飯,最拿手只是煮即時麵。但自從知道我病,每日都去街市買餸,煮飯給我食,每日都有五餸一湯。而且我對癌症嘅知識很貧乏,是他天天上網睇相關資料然後話給我知。」林淑敏面對患癌,為咗男友嘅未來着想,曾經忍痛提出分手,但陳中原並唔認為呢次患病會將佢地分開,當時最在意嘅反而係女友治療期間嘅狀況。當佢眼見林淑敏除咗甩頭髮之外,都仲可以食得好瞓得好,仲肥咗靚咗,佢就覺得比較安心。

Photo from sukman_lam@Instagram

人生最難得嘅,一定係遇到一個願意同自己有難同當嘅另一半,「愛」唔係靠把口講,陳中原用行動證明出對大小姐嘅真心~林淑敏康復後,陳中原向大小姐求婚:「康復後,他就決定要結婚。我真的很害怕,雖然已康復,但始終當時適逢是生育年齡,我有過這個病,未必能生小朋友,同時亦意味住我未必能給他一個健康的家庭。如果佢介意,咁就弊喇!」現代社會中,可以共苦嘅情侶有幾多對?陳中原一直都好重視林淑敏嘅想法,會將自己嘅感受放喺後面。即使女友患病,依然不離不棄,一早已經認定要同呢個女人一生一世,即使見到佢甩哂頭髮,大病後生育能力未及以前,都依然從不嫌棄。

Photo from sukman_lam@Instagram

其實林淑敏有諗過生BB,佢話好多生過乳癌嘅人,尤其係年輕女仔,生理周期比較差,可能過咗28日都係無月經,但佢無受到影響,生理周期依然正常,佢認為咁意味住佢生BB無問題。不過佢家族遺傳賀爾蒙過高,所以需要食抑制劑,接受賀爾蒙治療,大小姐食藥食咗5年,5年後佢其實可以選擇唔食然後生BB,不過佢問老公,老公就話怕佢因為賀爾蒙起變化,而增加病症復發嘅機會,所以唔想佢冒呢個險。

Photo from sukman_lam@Instagram

其實有無生BB都唔係最重要,兩個人開開心心,好似林淑敏同陳中原咁互相支持同照顧,能同甘也能共苦,先係最緊要!

Photo from sukman_lam@Instagram

Text:GirlsLike Editorial

Photo Source:

【看更多OL專屬最新美容時尚資訊】

👉🏻 立即Follow Instagram topbeautyhk

🔔 訂閱我們的 Youtube 頻道 TopBeauty HK