有潛質做好爸爸！陳展鵬為迎接第一胎上育嬰班，老婆單文柔佗B五個月，網民讚：佗得靚！

陳展鵬跟單文柔拍拖兩年，舊年9月宣布二人拉埋天窗同懷有豬bb～今年係單文柔以準媽媽身分過第一個新年，懷孕之後少咗露面嘅佢，近日就跟一班好姊妹聚頭，雖然腹大便便，但文柔睇落去仲係面尖尖，根本就無肥過！網民都大讚文柔少女味濃，佗b佗得好靚呢～

Photo from smyphoebe ＠ ig

老婆佗仔，新手準爸爸陳展鵬都打醒12分精神，把握時間學「做個好爸爸」，佢早前就上載一張上育嬰班嘅相片於社交平台，留言：「豬爸爸豬媽媽Are you Ready??I am Ready」為人父母總有第一次雞手鴨腳嘅時候，最緊要係唔怕辛苦畀心機學！展鵬上埋育嬰班，係咪100分嘅湊仔公都已經係後話啦，淨係咁有心幫輕太太，已經好抵讚喇～

rucochan ＠ ig

有網民大讚陳展鵬「肯幫手換片片的一定是個好爸爸」，連王君馨都留言話「即刻又靚仔咗」，已為人母嘅張名雅就話「而家啲爸爸全部都好親子。」

Photo from rucochan ＠ ig

BB雖然仲未出世，但陳家一家三口已經急不及待影全家幅，愛狗之人陳展鵬仲帶埋狗狗影「一家四口」家庭照，正如展鵬咁講，「身份多了，但也不能忘本。我也是他的終身情人。」窈窕嘅陳太即使大肚，仍然仙氣感十足～

Photo from rucochan ＠ ig

情人節當日，單文柔就和應老公，放上跟老公的「閃爆」甜蜜合照，承諾會做好老公身邊的女人，願為老公成為一個好媽媽，好老婆和好情人！「給仍在努力工作的你，你放心在外面工作，我會努力照顧好你的身體，為你準備足夠營養，當愛情昇華到另一個階段，身份也兩級跳，別忘了除了是媽媽，老婆外，還想成為你的好情人。」

Photo from rucochan ＠ ig

Text：GirlsLike Editorial

Photo source：Instagram