【Mean Talk】江美儀被豹哥單立文重提離婚崩潰痛哭：我人生是否應該繼續下去

By Fennie on 21 Jun 2021

Digital Editor

由江美儀和Bob林盛斌主持的TVB J2節目《Mean Talk》，近日請來了「豹哥」單立文同滕麗名擔任嘉賓，《Mean Talk》是以「攻陷」嘉賓為目標，但今次江美儀失守，被老友豹哥「反客為主」追問她與吳君如胞弟吳君祥離婚一事，並心痛江美儀獨力承受所有痛苦，令江美儀情緒崩潰在鏡頭前痛哭。

Photo from 《Mean Talk》截圖

豹哥捉住江美儀的手並眼濕濕：「你同你前任伴侶分開時，有沒有受到好大刺激？」江美儀立即回答：「我並無受好大刺激。」然後豹哥坦言好關心江美儀，但又擔心觸動她太多情緒而不敢騷擾她：「驚你頂唔順，我覺得你自己承受好多嘢，唔會同我哋講。我覺得你點解咁傻，孭起咁多嘢呢？同我哋講吖嘛！又唔係唔熟！你知唔知啫？」

Photo from 《Mean Talk》截圖

江美儀聽了之後首度在鏡頭前落淚：「我冇嘢㗎喇而家，我都唔知可以同邊個講吖嘛。有時兩個人相處，去到要離婚，未必係一件事發生咗，可能係一路累積，當累積到一段時間之後，我就開始覺得，我嘅人生係咪應該繼續落去。兩個人傾完之後覺得，可能分開仲好啲，所以最後就分開。其實你哋知道的時候，已經係好後期，呢件事其實發生咗好耐。」

Photo from 《Mean Talk》截圖

向來都予人硬朗感覺的江美儀自認自己不懂得釋放情緒，所有事都自己獨自承受，表面上好似好開心好堅強，實際上內心其實好脆弱、好不開心，被人欺負都不出聲。江美儀又指疫情期間更辛苦，因工作量大減而多了時間胡思亂想，幸好現在有工作可以寄託。

Photo from weibo@江美儀

江美儀與吳君祥拍拖11年，他們早於2006年在美國西雅圖秘密註冊結婚，為了不讓外界知道而一直以男女朋友相稱。相見好，同住難，江美儀與吳君祥因生活習慣不同而經常吵架、各自為事業奮鬥而忽略了對方的感受，令到對方感受不到被需要。後來有一次因吳君祥到外地工作，二人分隔兩地之後才發現原來做朋友反而更舒服，經過討論之後，二人決定退回朋友關係。