【Mean Talk】何廣沛被狠批聲音難聽 曾遭珍姐勸退：唔好做呢行

TVB J2新節目《Mean Talk》新一集邀請何廣沛、郭子豪及方紹聰擔任嘉賓，私底下分屬好友的三人在節目中毫無顧忌地互窒。至於近期以Mean見稱的江美儀及Bob不放過任何機會讀出三人大量負評，其中何廣沛被抨擊：「把聲真係好難聽！耳朵流產呀！」

被批聲線難聽

入行9年的上位小生何廣沛近年劇接劇做到冇停手，就連有份參與的綜藝節目《死因有可疑》等都陸續出街，人氣十足。不過，何廣沛入行初期曾經歷過低潮，尤其是他辨識度極高的聲線，更成為網民批評的對象。

入珍姐房苦練咬字

廣沛聞言直認最近遭珍姐（曾勵珍）提點：「佢話我講嘢真係唔得，做得好差，不如唔好做呢行啦！嗰刻我終於知道嚴重性。」他表示曾在珍姐房間練習英文咬字長達一小時，並坦言十分感激珍姐用心栽培及細心教導。

郭子豪回應失場事件

另一邊廂，郭子豪被問到2017年甩底倒數騷事件：「當時係種種原因導致自己入面亂晒籠，原因包括屋企，當時同前女友關係處理得唔好。總之唔想見人，有情緒問題。我直頭熄咗手機幾日，匿喺屋企。」

之後又自爆與女友鄧卓殷的肉麻點滴，原來小倆口從兩年前開始每晚都會開住視像電話入睡，令美儀和Bob大嘆「Sweet得嚟好黐線」，郭子豪續道「瞓住都唔會熄部電話，第二朝瞓醒又見到對方囉。如果佢仲未醒，我咪開住個Call做住自己嘢先。」
Text: TopBeauty Editorial