那些年哭得肝腸寸斷的電影《鐵達尼號》導演：Jack人選原本不是里安納度，換角全因里安納度太靚仔！
要講經典愛情電影，一定唔少得《鐵達尼號》》(Titanic) ，當年可謂感動全球，直至2012年上映3D版，依舊有好多人衝著當年嘅情懷再重睇一次。事實上，電視久唔久就會重播，大部分人都應該睇過兩次或以上了，因此對電影中嘅每一幕都記憶猶新，但即使多次重睇，仍然係會被戲中金童玉女嘅里安納度狄卡比奧 (Leonardo DiCaprio)同琦溫斯莉 (Kate Winslet)而感動。除咗愛情主線本身已經係可歌可泣之外，盛大嘅場面同極高顏值嘅主角就係呢套戲賣點了～時隔22年後，導演占士金馬倫就公開喺節目上大爆男主角Jack嘅人選原來一開始並唔係里安納度！
Photo from from Pinterest
《鐵達尼號》本身就係一套「超好喊」嘅戲，窮小子愛上富家女，於郵輪上邂逅相戀，繼而共度生離死別嘅凄美愛情，加上盛大嘅災難場面，令觀眾超有代入感，每次睇完都覺得好遺憾。更有《鐵達尼號》狂迷以數理計算木板可以承受幾大重量，推斷Jack唔需要凍死，可想言之大家到底有幾婉惜Jack 嘅離世。
Photo from from Pinterest
而飾演男主角Jack嘅里安納度更成為萬千女生「夢中男神」，角色集完美外貌同深情專一於一身嘅形象，仲願意為愛犧牲生命，試問邊個女生可以抵擋呢～
Photo from from Pinterest
不過導演占士金馬倫近日在出演清談節目《The Tonight Show Starring at Jimmy Fallon》時就大爆當年《鐵達尼號》選角嘅祕辛，坦言一開始男主角Jack呢個角色原來係意屬奧斯卡影帝馬修麥康納希 (Matthew McConaughey)出演！
Photo from from Pinterest
而馬修麥康納希之前都透露過自己曾參與《鐵達尼號》嘅試鏡，又表示試鏡後覺得自己對Jack一角穩操勝算，諗唔到最後卻被當年只有22歲嘅里安納度奪得呢個角色，對於佢嚟講至今都係一個遺憾！
Photo from from Pinterest
提到最後換角嘅原因，導演占士金馬倫回答竟然係「佢 (里安納度)太帥！」占士金馬倫表示原先就意屬馬修麥康納希出演，但當里安納度試鏡時，幾乎吸引成棟大廈嘅女生圍觀，果然係魅力非凡～令占士金馬倫產生「我應該選他會比較好吧？」嘅念頭～
Photo from from Pinterest
而占士金馬倫亦進一步爆料指當年選角時，其實里安納度曾經拒絕出演《鐵達尼號》，而占士金馬倫都因為里安納度於參與選角時只係坐埋一邊食煙發呆而感到不滿～不過當佢見到里安納度演繹當中嘅愛情戲份時就有所改觀，形容係「像突然被陽光照到一樣！」
Photo from from Pinterest
占士金馬倫更談及跟里安納度拍攝時曾有摩擦，二人就電影其中一句經典對白「I'm the king of the world」嘈交！當時拍攝Jack與同好友Fabrizio贏到鐵達尼號船票登上郵輪一幕時，劇組都陷入苦思，搵唔到一個較好嘅角度去詮釋興奮嘅一刻，最後占士金馬倫忽發其想即興創作，但就被里安納度質疑，拒絕說出這句對白，激到占士金馬倫爆粗回應「f**king sell it」才讓里安納度接受了！
能夠賦予角色一個靈魂，全靠演員同導演之間為拍攝討論時產生嘅激情同火花，從而創造一部膾炙人口，全球總票房高達21.87億美元嘅經典賣座電影！
Text：GirlsLike Editorial
Photo Source：Pinterest
