閨蜜旅行就是要做瘋狂事！分享口水尾、互影呃like相～Joey阿Sa出蠱惑，企定定扮滑雪高手影相，北海道之遊大放笑彈！
Joey容祖兒同蔡卓妍阿Sa一向都老友鬼鬼，咁多年嚟除咗係工作上嘅好拍檔、就連放假都會見到佢哋兩個孖公仔去旅行，可以話係形影不離！Joey 同阿Sa今次就約好同遊北海道，享受一轉滑雪旅行～
Photo from choisaaaa @ ig
Joey 之前透露今年開完演唱會之後，約好阿Sa去東非同希臘旅行，今次就先去個短短地嘅又於個人社交網站上透露工作超過忙碌，單單一個月已經要周圍飛「北京-東京-韓國-美國-廣州，腦袋和身體極度疲憊。幸好老早已經約好，Mark實死期，天皇都無面俾！」工作忙碌，最開心就係可以去旅行放鬆身心～
在 Instagram 查看這則貼文
Joey又透露今次嘅滑雪之行本來仲有阿嬌同楊受成細仔楊政龍一齊去，但另外兩個人最後都未有同行。阿Sa就tag埋好姐妹阿嬌，「爭妳呀 @q_gill ，下次必須join!!」
難得有假期，仲可以喺異地同好閨蜜聚一聚，感覺真係特別放鬆。Joey 都話喺最親蜜嘅人前，煩惱自然bye bye！「和好朋友相聚在雪地的確如夢一般，不知何解，有些人只要站在你面前，你便立刻變得開心和自在。」
Photo from choisaaaa ＠ ig
從片段可見，當地雖然有積雪，二人不懼寒冷，仲friend到唔介意對方「口水尾」共同食一支甜筒，相當老友。
Photo from yungchoyee ＠ ig
滑雪初體驗中，阿Sa透露係第一次滑雪，仲自嘲自己「無姿態無實際」，點都好，出得嚟行當然要「有型有款」，雖然係甲級裝備，丙級技術，影相靚靚先係女生最大考慮！（笑）
Photo from choisaaaa ＠ ig
Photo from choisaaaa ＠ ig
旅程嘅第三日，阿Sa嘅滑水技術似乎有咗新嘅突破！呢張「歷史性一刻」嘅相片真係好多滑雪高手都自愧不如啊～明星好友紛紛留言大讚好勁！由本來笨手笨腳嘅丙級技術，去到有舞王Michael Jackson咁好平衡度，進步神速背後竟然係Joey同阿Sa精心策劃嘅鬼主意...
Photo from choisaaaa ＠ ig
無幾耐，阿Sa就開心分享要影呢張相嘅「攝影教學」要做「滑雪高手」，你需要嘅並唔係技術，而係一個抵得諗，唔怕畀人笑，幫你揸相機，再瘋狂摩打手上身撥雪落你身上嘅「助手閨蜜」！阿Sa仲幫Joey起咗個朵—「無敵風火輪潑雪達人」。片段真係好搞笑，有網友留言要「想報名上堂」，小編都打算好好鑽研一下呢個攝影教學，下次去滑雪時有一技傍身！
人生可以搵到個陪你癲、陪你笑住做古怪事嘅合拍好友，真係好難得，要好好珍惜啊！
Text：GirlsLike Editorial
Photo Source：Instagram
