零酬勞幫運輸署拍片！葉德嫻為人敢言愛扶持後輩，曾經歷離婚子女疏離，現享受一個人生活～

呢兩日最紅嘅人物當然就係Deanie姐葉德嫻啦！運輸署邀請佢拍攝影片，片段中由葉德嫻提醒乘客乘坐公共交通工具嘅時候要記得顧己及人，因為短片內容實在引起香港人唔少共鳴，所以一出街就爆紅！ 葉德嫻好人就出哂名，短片拍攝咗3日，Deanie姐更係零片酬演出，真係唔話得呀～！

Photo from 運輸署影片

最新嘅運輸署宣傳影片熱爆整個互聯網，短片請來影后Deanie姐演出，教育乘客喺乘坐公共交通工具嘅時候要顧己及人。片中，Deanie姐又Mean又幽默嘅演出，引起唔少人嘅共鳴，大獲網民好評。

Photo from 運輸署影片

而今次拍攝需要喺港鐵收車後進行，所以一眾演員用咗3日時間拍攝，Deanie姐貴為影后，今次仗義參與拍攝，完全無收取任何片酬。片段一出街就爆紅，相信大家都已經吸收到Deanie姐想帶比大家嘅信息！

Photo from 運輸署影片

宜家71歲嘅葉德嫻，不嬲出名好人，得到唔少後輩敬重。佢多年前曾經歷離婚，雖然有囝囡，但彼此關係疏離，幸好本來個性樂觀嘅葉德嫻，卻無因為咁而變得意志消沈，宜家仲好享受過獨身嘅生活。

Photo from Sina

其實Deanie姐嘅成長背景比較特殊，有指Deanie姐爸爸嘅原配因未能生育，所以另娶二房，後來葉德嫻出生後，就被送去同大媽一齊生活，葉德嫻亦曾經表示過自己缺乏生母嘅愛護，所以渴望可以早啲結婚，組織屬於自己嘅家庭。

Photo from Sina

佢喺18歲嘅時候就同騎師鄭康業結婚，婚後育有一子一女，只可惜丈夫後來有外遇，當時囝囡仲細，葉德嫻為咗顧及佢地嘅感受，所以默忍丈夫不忠達7年，直至1980年囝囡都長大，佢先毅然同丈夫分開～

Photo from Sina

離婚之後，兩個囝囡就跟父親移居到外地生活，而Deanie姐就留喺香港發展演藝事業。佢亦曾經透露過，子女成長之後同自己關係疏離，唔係成日見面，大家各自生活。

Photo from Sina

後來，Deanie姐喺星途上都有一翻成就，除咗擁有多首名曲之外，更拍攝咗唔少受歡迎電影，當中最為人所知嘅一定係同華仔合作嘅《桃姐》，演技同音樂水準都深受賞識，而且佢嘅人品亦係出哂名好，唔少後輩都好敬重佢。

Photo from 桃姐

今日嘅佢好享受簡單同單身嘅生活，近年亦鐘意上素食，平時就成日做運動，每星期都會去做瑜伽、行山，跳踢躂舞，佢話：「我不喜歡生病，不想麻煩別人照顧我，所以相對嚴謹些。」

Text：TopBeauty Editorial

Photo Source：Weibo