「比起老公他更像爸爸！」《福爾摩師奶》陳松伶譜浪漫姐弟戀，小8歲暖男老公助她走出抑鬱陰霾～！

大台最近熱播《福爾摩師奶》由陳松伶（松松）出演，身為「收視福將」嘅松松只要擔正劇集一定大收，加上劇集屬懸疑推理類，相信觀眾們一定會睇得好過癮～多年無見佢皮膚同身材依舊保持狀態完美，望落仲好有精神，相信係因為佢同老公嘅美滿婚姻生活！

陳松伶同細8歲嘅內地演員張鐸於2011年結婚，計埋拍拖相愛逾十年，兩人依然十分恩愛，而張鐸亦係一名超級寵妻號，多年來凡事以太太為先，令松松安心做幸福人妻！

2006年松松不幸患上抑鬱症，日子過得非常煎熬，甚至萌生過輕生念頭，張鐸當時完全唔介意佢嘅病情，細心照顧、陪伴佢走過難捱時刻，松松好返後好感激張鐸並稱佢為「更生大使」。

張鐸係一個細心嘅好男人，但松松坦言當時被追求時，曾因兩人年齡差距太大而婉拒對方：「不過後來發現他真的很認真，是個傳統的中國男人，而且非常成熟。」後來張鐸一句「沒甚麼好害怕的」，成功令松松放低顧慮。

2006年陳松伶除患情緒病外，亦有過卵巢腫瘤，雖然佢一直都好鍾意小朋友，但試過好多方法仍一直未能成功懷孕。松松：「試了好多年都沒有成功，連老公都勸我不要再試，但是只要有一絲希望還是會繼續嘗試，好希望為老公生個BB，可是一切就要看天意了。」

張鐸並唔介意無小朋友，反而更加倍寵愛松松，自兩人戀情曝光後張鐸喺內地事業飛起更被封「師奶殺手」，但佢喺屋企依然會好細心照顧老婆，對此松松曾甜蜜透露：「他比起老公更像我的爸爸，一邊教我注意身體養身，一邊提醒我護膚，就連敷面膜也是他幫我的。」係個暖男老公無誤！

婚後張鐸亦好尊重松松，凡事以太太為先：「他說在一個家庭裡面，只可以聽一個人的話，所以他將所有決定都交給我，說我才是CEO。」

由於兩小口都係藝人，佢地唔想因事業繁忙而令感情褪色，為兩人有一定嘅相處時間更訂下「家規」：不可分開超過兩星期～

張鐸私底下更暱稱老婆叫「松公主」，又經常大讚老婆又美又可愛，簡直好似一個小粉絲咁，喺微博分享合照時就連網民都忍唔住問：「為什麼張鐸每張照片都沒在看鏡頭，只是看松松？」

而松松對老公嘅付出亦有回應，面對事業同家庭兩個選擇，松松表示：「婚姻還是最重要的，因為組成了一個家庭，這對我來說是最重要的，我還是一個比較屬於家庭型的人。在家人特別是老公的支持下，我覺得我能夠做很多的事情，家人是我很強大的後盾。」的確，兩夫妻能互相扶持比任何事都強大啊～！

Text：TopBeauty Editorial

Photo source：Weibo, TVB