蕭正楠為黃翠如甜蜜慶生，巨型心心蘋果樹蛋糕原來是紀念「定情」！細數蕭正楠3個暖男友特點～

By Michelle on 24 Oct 2018

Digital Editor

Life is short, don't be lazy . Be your own idol to enjoy every moment !

噚日係翠如bb 37歲生日，一向愛得煙韌嘅男朋友蕭正楠特意為女友搞咗個「全男班」生日會，袁偉豪、曹永廉、楊潮凱、區永權齊齊幫翠如慶生。鬼主意多多嘅蕭正楠仲幫翠如準備咗一個巨型蘋果樹蛋糕，大蘋果被一個心形樹枝包圍，寫上「Fish Happy Birthday」，原來蛋糕係有特別含意！蕭正楠如此有心思，實屬好男友無誤～

Photo from edwinsiu @ ig

黃翠如同蕭正楠拍拖4年，兩個人愈愛愈高調，經常被傳媒追問感情事，人前人後都好甜蜜。噚日係翠如37歲生日，蕭正楠一早約好一班朋友到餐廳為翠如慶祝，眼見相片翠如捧住一個「東海堂」蛋糕，其實唔止咁簡單！蕭正楠其實一早準備咗一個巨型心心蘋果樹蛋糕！淨係個蘋果都已經大過個頭，仲用心型樹枝包住，外型好似掛喺一個心型樹上，超靚！

Photo from wongtsuiyu ＠ig

#1 讓你融入自己嘅生活圈子

有人會強調自己需要有私人空間，但翠如bb同蕭正楠呢對就唔係咁諗喇。翠如bb同蕭正楠一班老友勁friend，個個都變哂做自己朋友。其實男方願意畀女方融入自己嘅生活圈子，無疑都係一枝強心針～正如翠如多謝男朋友：「謝謝蕭一，為我準備了一個全男班的生日飯，一班男人的約會，總覺得我也是男人的一分子。」當女方清楚自己交往中嘅人會同咩人有來往，自己就可以更放心向男方投信任票，而且一個圈子自然會有更多嘅共同話題，感情自然穩固。

Photo from wongtsuiyu @ ig

#2 為你締造驚喜

拍拖4年，可能想送嘅禮物都送過了；想去嘅地方都去過了，但偏偏仍然重視每一個節日，為感情締造一個又一個嘅驚喜。蕭正楠為翠如注入滿滿嘅熱情，令戀情保鮮升溫～其實兩個人拍拖咁上下日子，一定會漸漸變得平淡，但只要願意為對方花心思，感情先得以維繫。蕭正楠又約埋班兄弟，準備煙花蠟燭?到壽星女心花怒放，既驚喜又有愛～據知，呢個別出心裁嘅生日蛋糕是由蕭正楠與本地蛋糕設計師Jimmy構思，如此獨一無二嘅作品，邊個話拍拖耐就搞唔到驚喜？

Photo from wongtsuiyu ＠ig

#3 不忘初心

蕭正楠都係一個不忘初心嘅好男友！其實呢個巨型蘋果樹蛋糕別具意義！早喺4年前，黃翠如同蕭正楠第一次合作拍劇《師奶Madam》，因此擦出火花，之後正式由幕前情侶搬到現實，愈愛愈甜蜜。今次蕭正楠準備嘅蛋糕，正正係紀念二人相識嘅緣份—《師奶Madam》中，黃翠如嘅名叫「花蘋」，而蕭正楠就係「羅大樹」，呢個蛋糕就係代表住「羅大樹愛花蘋」嘅定情，真係sweet到爆～