曾因愛情盲目令自己萬劫不復。浴火重生趙頌茹：與其在乎別人喜不喜愛你，不如好好喜愛自己～

By Michelle on 05 Mar 2019

Digital Editor

Life is short, don't be lazy . Be your own idol to enjoy every moment !

你相信「生本快樂」還是「生本不樂」？趙頌茹（Yu）2014年跟周永恆離婚，事隔4年，一提到Yu嘅名，大家仍然會聯想到佢有一段唔快樂嘅過去。傳媒鋪天蓋地嘅報導，令大家都知道佢被枕邊人背叛、家暴。Yu曾經話過：「沒有人是100%快樂的，只要快樂比不快樂多，這樣就足夠了。」前夫周永恆已經再婚兼生仔，Yu則一手一腳湊大兩個女，如果要由頭細數到底係咩令Yu有呢份堅強嘅信念，大概就係被「不快樂」嘅點滴令佢嘅生命更加豐盛吧！痛醒過後，浴火重生嘅Yu感激過去種種傷害「回頭想起，感激這些經歷，教懂我如何為人女兒、母親和女人。」

Photo from chiuchungyu ＠ ig

對於快樂與不快樂，Yu有自己一套見解。「沒有人是100%快樂的，然而人的本性往往是把不快樂放大，想用盡一切方法把它們趕走，有時不知不覺連該用來尋找快樂的力氣都同盡了。其實只要快樂比不快樂多，這樣就足夠了！」有第三者、被出賣、老公拋妻棄女、離婚，每一個標籤都係負面，而且對女人嚟講，係家醜、亦係難以獨自面對嘅傷害。愛上一個世紀渣男，傷痛令自己一夜白髮，Yu無再提及自己有幾唔快樂，反而用自我療癒、自我勉勵嘅方式令自己舒服，你可以形容係一種自我保護，但從Yu身上，你更會明白何謂「放過別人等如放過自己。」

Photo from chiuchungyu ＠ ig

21歲遇上初戀情人，27歲結婚，Yu笑言自己「愛得單純。」如今回望，就係「兒戲」、「幼稚」，人嘅成長跟家庭背景有莫大關係，Yu作為家中長女，細個時候屋企人對佢要求嚴謹，而且佢亦要盡上家姐責任，照顧妹妹，年紀輕輕，不知海闊地高，已經被壓力侵蝕少女自由身嘅靈魂。「自己做得唔夠好」嘅諗法根深蒂固，長大後於戀愛關係上，未學會戀愛真諦—雙方付出、包容同遷就，已經要承受被愛人背叛嘅感覺。Yu一直只懂得將就，從來都無傾聽自己內心，間接令自己受傷害。

Photo from chiuchungyu ＠ ig

跟前夫嘅婚姻中，Yu自知處於下靶位，經常怪自己做得唔夠好。內心一股自卑嘅力量令佢不知不覺間愛錯了，亦變成一個唔識愛自己嘅女人。由拍拖到結婚，Yu都係「順其自然」地處理，「當初與他的價值觀或許早已不合，結婚前，我們的確沒有太多溝通。」因為無認真考慮對方係唔係理想嘅終身伴侶，就令佢差啲走入萬劫不復之地。

Photo from chiuchungyu ＠ ig

曾經覺得一家人應該共同進退才算得上係「家」，發生婚外情，Yu有選擇畀機會前夫改過自身，但最後「忍耐」嘅籌碼換唔到對方浪子回頭嘅決心。作為媽媽，Yu寧願背負著「單親」之名都要換一個健康家庭環境畀兩個女。「我很怕和別人提及自己離婚，自己單親媽媽，又曾經被家暴。」即使無明燈照亮前路，佢都提醒自己要重新做人，兩個女成為佢努力嘅動力—努力為頭家、努力為自己、努力搵番從小失去嘅自信、努力學習欣賞自己、努力學會獨處。