誰說初戀一定會失敗！4位明星不受娛樂圈誘惑，對初戀愛人從一而終，最後踏入教堂～

By Aisa on 05 Mar 2019

一個追逐夢想的女生，深信未來是屬於相信心中美夢的人。

可以同初戀踏入教堂，喺現今社會真係無幾對，以前唔成熟、唔識照顧人、唔夠定力等種種原因都會令你無辦法同初戀對像行落去～尤其喺娛樂圈呢個充滿誘惑嘅地方，可以從一而終嘅明星就更加少之又少，不過以下呢幾對就可以做到，直到宜家都仍然好恩愛，令大家都不禁相信世界上係有真愛～

# 吳尊

曾經係台灣偶像團體飛輪海成員嘅吳尊，2013年承認已經同宜家老婆結婚並育有一女嘅事實，當時震驚中港台娛樂圈。吳尊表示自己已經喺2009年同相愛18年嘅初戀對象林麗瑩結婚，仲有一個囡囡NeiNei～

Photo from Weibo

吳尊同太太16歲嘅時候一見鍾情，吳尊樣貌俊俏，喺娛樂圈中不乏仰慕者，但佢從一而終，佢話：「不會做令家人傷心的事情，誓言對婚姻忠誠。」後來喺內地節目《最美的時光》中，吳爸爸亦剖白自己老婆都係初戀情人，原來深情係有遺傳嫁～

Photo from Weibo

# 王君馨

王君馨同圈外男友Daniel愛情長跑11年，最終踏入教堂。Daniel係Grace嘅初戀，當時Grace喺香港工作，男友就長居紐約，分隔兩地每年只可以見一、兩次面，平時要靠視像通話維繫感情。兩人一路走來並不容易，中間經歷離離合合，但幸好最後都可以修成正果。

Photo from gwgurlie86@Instagram

# 車太鉉

近年喺《與神同行》電影再同觀眾見面嘅車太鉉，當年以《我的野蠻女友》紅遍亞洲，電影入面深情嘅演出搞喊唔少觀眾，而現實中佢亦係一個專一嘅男人。2006年佢同拍拖13年嘅初戀女朋崔錫恩結婚，宜家車太鉉同太太育有一個囝囝同兩個囡囡，婚姻生活非常美滿～

Photo from Sina

# 莫文蔚

莫文蔚其實唔係一直都同初戀一齊，佢曾經同過周星馳同馮德倫拍拖，而同馮德倫嘅情侶關係更係維持咗11年，不過最後同佢步入教堂嘅人，都係佢嘅德國籍初戀男友Johannes。其實莫文蔚同Johannes17歲嘅時候就認識，兩個人都係對方初戀。之後雖然分開，兩人各自喺愛情路上摸索，最終於38歲再次相遇，並重燃愛火，緣份將佢地再次拉埋一齊。