「見到她就好像見到陽光！」憑《逆流大叔》入圍金像獎男配角，潘燦良與蘇玉華22年細水長流的愛情～！

講起蘇玉華好多人都會諗起佢喺《美女廚房》中所展示嘅高超廚藝，佢私底下性格親切隨和，仲同香港著名舞台劇演員潘燦良有一段22年嘅穩定交往關係，近日男友更憑電影《逆流大叔》成功入圍金像獎「最佳男配角」，呢對情侶真係羨煞旁人啊！

有「劇圍王子」之稱嘅潘燦良91年開始參與舞台劇演出，1993年曾憑《南海十三郎》入圍金像獎最佳男配角，今次喺《逆流大叔》中出演工程技工中年大叔，從划龍舟中重新找回對生活嘅熱度，精湛演技令佢成功入圍角逐今年金像獎「最佳男配角」！

演出多年舞台劇亦多得女友蘇玉華喺背後全力支持，呢位女友係大台一線花旦，曾喺《美女廚房》靠高超廚藝榮獲「美女廚神」封號，絕對係「全得廚房出得廳堂」嘅100分女人！

兩人讀演藝學院時已經認識，之後又一齊加入香港話劇團，後來發展成戀人關係，相戀22年恩愛有增無減，亦非常信任對方！

佢地拍拖22年但無註冊結婚，或者有部分人覺得咁樣嘅關係並無任何保障，一句分開就了百事，但一張婚紙對於蘇玉華同潘燦良嚟講毫無意義，皆因兩人早已認定對方為終生伴侶！

潘燦良咁樣形容蘇玉華「見到佢就好似見到陽光」，又曾大讚女友：「一齊相處後，發現互相性格都係合得來。我比較柔弱，又比較保守穩重，但佢就係比較勇敢、開放。一凹一凸其實某程度上係配合得嚟。我欣賞佢好有膽色，有時我都會畀人悲觀的感覺，但佢就係好樂觀，所以佢能夠影響到我。」

蘇玉華亦曾公開表示男友係靈魂伴侶，過著同一般夫婦無異嘅同居生活，令唔少人都追問婚訊，不過兩人就表示未有計劃結婚，潘燦良：「我們都比較懶，不時會想結婚，但隔一陣就會放低。加上覺得依家狀況好好，大家都認定對方係餘下人生的另一半，對我來說她已經是我的家人。」

而蘇玉華頒獎當晚會陪同男友出席，佢毫不掩飾希望潘燦良拎獎嘅心情：「已經諗緊着咩裙，希望唔會失禮佢，亦希望佢攞獎。作為電影新人，我為佢感到驕傲，好彩拍到一部好電影。」有個對自己有信心、又會為自己嘅成功而高興嘅伴侶實在難得！

Text：TopBeauty Editorial

Photo source：Sina, Weibo, Facebook