無架子更超敬業！發哥拍戲受傷血流滿臉，傷口長達1吋入醫縫5針，之後再趕返片場繼續拍攝！

周潤發（發哥）雖然貴為影帝，但平日為人友善親民無架子，令香港人都好尊敬呢一位巨星！日前發哥拍戲不慎受傷，傷口更長達1吋，但佢依然堅持待拍攝完畢後先入院，最後縫咗足足5針，入院2個鐘後又急急腳趕返片場繼續拍攝，網民都大讚佢十分敬業！

近日發哥參與拍攝《驕陽歲月》，有一場戲講述佢被黃德斌追債後再被襲擊，但追逐過程中不慎頭部受傷，但發哥無叫停繼續完成拍攝該場嘅戲份！

喊cut後發哥用手撳着頭頂，自行走出片場並坐底，數條血跡從佢額頭流至臉頰，呢個時候工作人員先驚覺佢受咗傷，大家都紛紛大為緊張並湧至發哥面前查看同詢問傷勢。

正當大家都亂套嘅時候，發哥反而非常冷靜地叫各位唔使擔心，又請人幫手拎水畀佢清洗傷口，而當時發嫂喺場外準備緊午餐，知道老公受傷後立即趕到身邊並擔心地問：「點解搞成咁？」發哥就連忙安慰老婆稱傷勢唔嚴重，之後又請人撥開頭髮畀發嫂查看傷口。

一睇先發現傷口竟長達1吋，喺導演潘耀明、監製黃斌同動作指導李忠志等人力勸下，發哥先決定去醫院，又喺臨出發前安慰大家：「定啲、唔好驚！」，為免阻礙拍攝行程，發哥更叫導演潘耀明先跳拍其他戲份：「你先拍呢邊，我縫兩針返嚟繼續」，又緩和現場緊張氣氛：「淡淡定，有錢剩！」真男人無誤！

去到醫院檢查後醫生話為免傷口受細菌感染，個傷口必須縫5針！發哥聽見後就擔心表示：「我仲要返現場繼續拍攝，又要連戲，不要剃頭髮可以嗎？」最後喺醫生悉心護理下只剃走很小部分頭髮。

處理完傷口過咗2個鐘發哥就急急腳趕返片場，食咗午餐（遲來的）後就繼續埋位拍攝，而傷口因縫咗5針，發哥更要日日去醫院消毒同拆線，敬業精神令人佩服得五體投地！

Text：TopBeauty Editorial

Photo source：