離巢後即嫁人！「少婦聯盟」34歲沈卓盈宣佈與內衣富商Calvin結婚，情路兜轉終搵到好歸宿～！

為大台「少婦聯盟」成員之一34歲沈卓盈（Jessie）今日喺個人Instagram上宣佈結婚喜訊，老公係經營內衣生意富商Calvin，並貼出一組超靚婚紗相，消息公開後網民們都紛紛送上祝福～！

沈卓盈早前與老公特前往英國同法國拍攝婚紗相，包括巴黎鐵塔同搭水晶南瓜車，Jessie身穿大熱以色列Audella Bridal名牌婚紗，一對新人好似童話故事中嘅公主同王子咁浪漫！

Jessie寫道：「從不期望驚天動地的愛情 ，只求細水長流的甜蜜。不知不覺間原來我們的緣份源於十年前的一面，可是種子並沒有在那一刻萌芽。猶幸上帝的安排、緣份的牽引，令我們在四年前的那一天再次重遇，讓彼此加深了解，一起學習，一起成長，再一同走向人生的新一頁，成為相依相伴的伴侶。」

據悉兩人於2016年陷入熱戀，一直以來感情穩定，Jessie早前接受訪問時亦表示同Calvin喺婚事上已有共識，唔排除會閃婚～

Jessie係繼陳凱琳後第2位出嫁嘅「少婦聯盟」成員，今年年頭沈卓盈宣佈離開工作16年嘅大台，加上同Calvin感情非常穩定，所以已有人猜測佢好事近，據悉Jessie離巢後搬到何文田豪宅與Calvin同住過少奶奶生活～

沈大師一向擇偶條件高但情路兜轉，先後同機師Simon、金融才俊Ray拍拖但最後都分手收場，因此多次被人詬病釣金龜，Jessie當時嬲爆反擊：「只求釣甚麼金龜的話，我想我一早已經成功了，還需要在捱嗎？所以請停止侮辱我的人格！」

同前男友Ray分手後，Jessie就遇上真命天子Calvin，經常被拍到兩人孖住行街，如今Jessie終於覓得好郎君，真係恭喜晒！

Text：TopBeauty Editorial

Photo source：Instagram