
萬大事有我撐腰!謝安琪表演險失準無助落淚,張繼聰送上強大鼓勵:災難係堅,不過你更堅!
謝安琪 Kay 琴日啱啱過咗42歲生日,對於Kay嚟講,今年生日真係難忙至極啊!事關日前佢出席公開活動,需要演唱5首歌曲,點知唱第一首《羅生門》時發現耳機失靈,即使後台工作人員換過另一對耳機,都係無效!Kay全晚只靠自己執生完成演出,仲徬徨無助到淚曬當場!老公張繼聰發揮暖男老公角色,漏夜喺ig上發文讚老婆叻叻豬:「災難係堅嘅,不過我認為你更堅﹗」
Photo from louischeung2013 @ ig
張繼聰為老婆護航解釋,佢話當時Kay於整個表演中因為耳機失靈,完全聽唔到自己把聲,又聽唔到音樂聲,只係聽到耳機嘅沙沙聲,同觀眾席音響彈番嚟嘅聲。當時Kay要面對幾千個觀眾,作為專業嘅表演者,深知環境條件真係對演出極度不利,但都只可以硬住頭皮唱落去—張繼聰形容太太非常專業,而且係訓練有素,達到「心中有劍」嘅境界,「個騷你唔止go on ,仲充滿勇氣咁完成...大佬,聽唔到聲照唱,部琴冇聲照彈,聽唔到音樂數唔到拍子照入歌喎!」
Kay事後亦話,今次係入行咁耐遇到最嚴重嘅情況,雖然心情係極度徬徨,但都只可以盡力演出。當時現場幾千對眼望住自己,真係心血少啲都唔得。張繼聰大讚老婆堅持同穩定演出好「堅」—「於困難環境仍然奮力完成整個演出,冇放棄任何一粒音任何一個小節。」
Photo from louischeung2013 @ ig
「知道你為咗依個演出,花咗無數嘅心血去練習再練習,希望做到最好。可惜Live performance 永遠有無限嘅意外會發生,而今次發生嘅意外,係歌手最恐懼嘅一種……耳機失靈。依種情境,任何表演者發夢遇到都保証會嚇醒,不過,可惜,今次單嘢係堅嘅。依二十分鐘嘅痛苦,恐懼,㥬惶,心血白費...對表演者嚟講,係災難。災難係堅嘅,不過我認為你更堅。」
Photo from kaytse @ ig
張繼聰又打趣咁講,今次事故係個天送畀老婆嘅禮物—「經歷係用嚟強化自己嘅 。312,個宇宙預早送依份禮物俾你,等你再Level Up ,算係咁啦!」發文一日已經有近2萬人讚好,大家都勁讚Kay 臨危不亂。阿bob就搞笑咁問:「冧到呢,你幾時會打篇類似嘅嘢俾我?」
Photo from kaytse @ ig
由以前大家都覺得佢哋兩個女尊男卑,好多人質疑佢地會唔會合久必分,男方又因為壓力大而患上抑鬱症,兩公婆一直係你撐我、我撐你。只要有你係身邊,就以無視外界雜音面對一切,謝安琪、張繼聰培養出無人能及嘅默契。小編覺得,Kay於台上臨危不亂穩定演出,明白表演喺任何時刻都係Show must go on(演出必須繼續下去),真係好勁~生命又何嘗唔係Life must go on (生活必須繼續下去)呢?至緊要,身邊有一個不離不棄,共患難也共富貴嘅愛人~
Photo from louischeung2013 @ ig
兩人結婚12年經歷高低風浪,張繼聰多年來一直用心守護太太Kay,份人又隨和又幽默,咁樣嘅男人實在太完美啦!
Text:TopBeauty Editorial
Photo Source:instagram