吳謹言最新時裝劇《標化女王》！上演職場版延禧攻略，與「國民老公」何潤東合作～

《延禧攻略》雖然已經播映完，不過被劇集捧紅嘅一眾演員都依然備受關注～尤其係劇中女主角吳謹言，因為瓔珞一角而躍升為現時灸手可熱嘅女星，最近佢所主演嘅新劇《標化女王》正式開鏡！相信又會係一套必追嘅劇啦～

Photo from 吳謹言@Weibo

已知吳謹言將會喺《皓鑭傳》以及《朝歌》兩套古裝大片分別同聶遠及許凱再度合作，有望喺今年底或者明年初播出～以前一直有網民指現代版吳謹言比較好睇，而今次大家就有機會透過現代劇《標化女王》一睹佢嘅時裝打扮啦！

Photo from 吳謹言@Weibo

呢套《標化女王》被網民譽為「職場版延禧攻略」，講述吳謹言飾演嘅職場新人章小魚，喺機緣巧合嘅情況下加入法國著名化妝品牌公司，成為銷售總監林睿嘅助理，由一個咩都唔識嘅小職員逐漸學懂職場生存之道，一步一步成為職場上嘅女王～

Photo from 吳謹言@Weibo

唔少網民話劇集情節好像《延禧攻略》講述瓔珞由小宮女逆襲成皇后嘅過程，可以見識到人唔同嘅陰暗面，等大家都可以從中偷師學識一啲職場生存之道～

Photo from 吳謹言@Weibo

將會同吳謹言有唔少對手戲嘅銷售總監林睿一角將會由資深演員殷桃飾演，佢演藝資歷相當豐富，係備受認可嘅演技派～而喺劇入面，佢係作風霸氣果斷嘅職場女王，係章小魚好崇拜嘅對象，同章小魚嘅關係亦師亦友，一步步助佢成長～

Photo from 吳謹言@Weibo

而除咗兩位女主演之外，出演男主角係憑住《那年花開月正圓》成為「國民老公」嘅何潤東～佢將飾演霸道總裁溫哲，喺職場上運籌帷幄，心思沉穩嘅佢會被熱情單純嘅章小魚深深吸引，展開一段甜蜜戀情～

Photo from 何潤東@Weibo

其實今年年初仲有傳出呢套劇會由迪麗熱巴同埋胡一天兩位人氣演員主演，不過最後都無成事，但吳謹言同何潤東呢個組合充滿新鮮感，相信會擦出不一樣嘅火花！

Photo from 吳謹言@Weibo

而今次嘅故事設定係高端嘅化妝品行業，所以主角嘅服飾造型相信會係一大睇頭，大家喺欣賞劇情嘅時就可以借機學一下職場時尚打扮啦！

Photo from 吳謹言@Weibo

Text：Girlslike Editorial

Photo Source：