珍珠奶茶除了致肥，仲會加快皮膚衰老同出現脫髮問題～曾有案例因咬珍珠而出現大細面，咬合時發出吱吱聲！

By Maggie on 04 Apr 2019

Digital Editor

台式飲品喺香港開店開到成行成市，無論妳去到邊都仲有一間係左近。甜絲絲嘅台式奶茶、Q彈嘅珍珠真係令一眾香港女生飲到欲罷不能～其實女生普遍都知道珍珠奶茶易致肥，但原來除左致肥，仲會引致皮膚衰老、毛囊發炎又或者出現大細面情況等等，諗諗下都係忍下口飲少兩杯吧！（哭)

1.加快皮膚衰老

曾有傳媒報導，台灣人有個珍珠奶茶愛好者由初中開始就日日飲一杯500cc大杯裝珍珠奶茶，一飲就飲咗20年。皮膚檢測結果一出發現30多歲嘅佢皮膚狀況竟然老化至同50歲一樣。皮膚科醫生解釋，珍珠奶茶含大量糖份，因而產生極多唔好嘅蛋白質分解脢，會令皮膚皺紋、鬆弛，同毛孔粗大～皮膚真皮層嘅膠原蛋白又會變少，令皮膚失去彈性！可以的話真係要戒飲珍珠奶茶，戒唔到就少糖或走糖吧！

Photo from ig @ angela.yuen

Photo from ig @ irisxbloomy

2.毛囊發炎引致脫髮

同樣發生喺台灣，有個11歲妹妹因爲太鍾意飲珍珠奶茶，喺日日飲嘅情況下，最後因毛囊發炎引致令頭頂同後腦位置出現大量脫髮問題。而醫生解釋頭皮紅腫同脫髮問題係因為每日攝取大量糖份所致，而特別愛食甜吃嘅人比少食甜吃嘅人會增加2至3成機會患上毛囊炎。大量糖份會令油脂分泌失調，引致毛囊閉塞同發炎。嚴重起上來可以永久禿頭～

Photo from ig @ava112411

Photo from ig @ fanfan

3.大細面出現

台灣桃園市楊梅天成醫院有一個病例，有一個30歲女士因長期過度使用咀嚼肌，加上咬合不正嘅情況下咬珍珠，所以喺每次打開口時都關節都會發出吱吱聲，後來更嚴重到唔可以打開嘴巴。醫生檢查後話女士嘅顳顎關節發炎同已經變形，令面部肌肉受損，而且令臉部線條膨脹，造成大細面！輕則咬合時會發出吱吱，嚴重起上來，可以張開口有困難同下巴甩臼！