一家4口遊美國，愛妻號張頴康超人爸爸上身，捱眼瞓揸長途車「搏哂命保護自己家庭！」

By Michelle on 08 Apr 2019

Digital Editor

Life is short, don't be lazy . Be your own idol to enjoy every moment !

張頴康出名係「愛妻號」，自言自己連第一次同太太傾電話、幾時約會都記得，拍拖11週年紀念日中，又勁冧咁話如果命運可以再次選擇，一樣會娶麥雅緻做老婆～好多人大讚佢係終極暖男無誤～日前張頴康一家四口到美國旅行，於ig上載一張拎住酒杯但就滿臉倦容嘅相，原來係佢回憶起「保護家庭」呢回事突然有感而發。

Photo from fb@ 張頴康麥雅緻專頁

張頴康憶起9年前跟當時仍係女朋友嘅麥雅緻到美國嘅經歷，又搞笑咁話當年自己「偷步」稱呼麥雅緻做老婆。全文如下：

「好記得9年前第一次跟我老婆嚟美國（嗰陣時仲係女朋友咋，但係都偷步叫緊佢做老婆?）有一晚，我哋喺洛杉磯玩完要返三藩市！但係我老婆突然間發燒好唔舒服，我外父即刻二話不說車我哋返去！「車我哋返去」唔係講緊上水去香港仔，而係5個半鐘頭嘅車程呀！喺呢5個半鐘頭嘅車程裡面，我見到我外父一邊頂住眼瞓、一邊好努力好小心咁揸車送個女返屋企！當時我只係覺得，原來一個爸爸錫自己個女...係可以去得咁盡㗎！所以今日，我由洛杉磯揸車去到拉斯維加斯，就算冇5個半鐘，但係都有4個半鐘！（揸呢程車真係好攰好眼瞓，完全要諗住車上面瞓咗嘅老婆、小豆同小花生先至撐得住）我咁講並唔係要比較，而係想俾大家知道，原來做咗爸爸之後，真係會搏哂命咁去保護自己嘅家庭！喺呢一刻，老婆、小豆同小花生都瞓咗喇！我終於可以獎勵自己少少喇！早抖！」

Photo from cheungwinghong @ ig

有自駕經驗、揸過長途車嘅人都知，要堅持唔恰眼瞓真係好辛苦～相信張頴康心血來潮發文全因「做男人要保護一家大細」心態，真係好man啊～太太麥雅緻其後都有於fb上放出旅遊相，又大讚老公努力carry一家人—「爸爸好厲害哦，一個人開車照顧晒我哋，所以我哋覺得好快就到⋯」

Photo from fb ＠張頴康麥雅緻專頁

湊住兩個小朋友去旅行真係唔容易，細囝小花生係第一次搭飛機，雖然有bb床，但張頴康仍然手抱囝囝氹囝囝瞓教，成個畫面真係好有愛～

Photo from angie617 @ ig

Photo from fb@ 張頴康麥雅緻專頁

現時一家四口係好多人眼中嘅幸福模範家庭，但回望過去，二人組織家庭路都唔係一帆風順，當年張頴康連半紅不黑都稱唔上，為咗跟太太成家立室，佢一度放棄自己做演員嘅理想，轉而做文職，更需要在中港兩邊走，夫妻二人聚少離多。

Photo from angie617 ＠ ig

因為一次車禍，生命面臨威脅嘅一刻，最令張頴康後悔嘅係無做到自己鍾意做嘅事。太太眼見老公有志未能伸，鼓勵佢繼續追夢，「錢唔好再諗，屋企由我去頂。」看似柔弱嘅女兒家發揮女人強大力量，擔起成頭家，為嘅就係希望老公能夠圓夢。

Photo from angie617 ＠ ig

張頴康一直好感激太太當年全力支持，入行第16個年頭，張頴康2016年摘下《TVB馬來西亞星光薈萃頒獎典禮2016》「最喜愛TVB飛躍進步男藝員」，演藝終於受到肯定。

Photo from from TVB

跟太太一起走過高山低谷嘅一點一滴，張頴康仍然記憶猶新，11週年拍拖紀念日，張頴康發出二人拍拖時期嘅青澀合照：「2008年1月4日，我哋第一次通電話，睇戲，約會！假設12年前，我哋由小學一年級開始相識，拍拖直到今日，我哋就中學畢業喇！如果畀我再揀多次，我一樣會決定喺四年後大學畢業即刻娶你做我老婆！我愛你！」網民祝福佢哋天長地久。

Photo from angie617 ＠ ig

有人話愛情得意嘅感覺，終有一日會由激情變成一種責任，失去激情嘅愛情會變得乏味。如果人生長期停留於追求激情，新鮮感嘅愛慕之情，大概只係你未能搵到一個願意陪你一起慢慢老去嘅愛侶。

Photo from angie617 ＠ ig3

張頴康去年跟太太結婚紀念日時，就甜到爆同太太講希望要同你慶祝60週年結婚紀念日，當時麥雅緻話：「都唔知我哋有冇咁長命喇。」無錯，生老病死係人生必經一課，但張頴康就表示就算命運自有安排，但「只要有呢個信念，往後嘅日子，我哋一定唔會浪費相處嘅時光。」張頴康又甜蜜跟太太許下願望「老婆，多謝你俾咗個屬於我哋嘅家，我愛你！期待60週年同你用假牙食飯慶祝！」