時代終結，愛卻長存！日皇明仁退位前慶結婚60周年，多年來每朝與皇后美智子牽手散步～
日皇明仁即將退位，日本年號亦會由「平成」改為「令和」，雖然時代快要終結，但日皇同皇后美智子嘅愛情卻無半點消逝，踏入兩人結婚60周年，日前佢地被拍到牽手步出皇官賞櫻，成為一時佳話，不過原來佢地習慣每朝都一齊散步，經歷60年仍然恩愛如初。
Photo from Pinterest
其實日皇同皇后嘅故事就好似童話一樣咁戲劇化，日皇明仁同皇后美智子嘅相識好浪漫，當年仲係皇太子嘅明仁喺一次網球比賽上遇到美智子，並對美智子一見鐘情，之後通過朋友介紹認識咗佢，成日借機約美智子打網球，後來兩人因為有住一樣嘅喜好，感情快速發展成為戀人，呢段戀愛被日本傳媒稱為「網球場上的愛情史」～
Photo from Pinterest
皇太子明仁深愛住美智子，所以翌年就急不及待要向佢求婚，但呢個舉動就引起咗好多風波，因為大家都覺得日本皇太子一定要搵皇室女子做伴侶，先算門當戶對～美智子雖然家境不俗，又知書識禮，不過身為民間女子嘅佢依然唔係一個「合格」嘅人選，就連當時嘅皇后香淳都對個囝嘅決定覺得好不滿。而美智子嘅父母亦覺得自己個囡自身條件唔差，何必要嫁到皇室被欺負，都唔願意點頭答應，最後要明仁天皇嘅父親昭和天皇出面調停，並且親自批准呢門婚姻，二人先可以喺1959年結為夫妻～
Photo from Pinterest
雖然美智子嫁入皇室，但佢承受更沉重嘅壓力，平民出身嘅佢要適應凡事都有規有矩嘅皇室生活相當唔容易。再加上皇后香淳 ，即係皇太子明仁嘅母親，給予佢無情嘅對待，令到佢一度患上失語症，幸好有丈夫一直守候喺身旁，做佢嘅後盾，以及大眾嘅支持，先逐漸康復。
Photo from Pinterest
後來皇太子明仁繼位成天皇，而美智子亦成為皇后。美智子為冰冷嘅皇室帶來一絲溫暖，佢喺皇室入面過著平民一樣嘅婚姻生活，做一個會親自下廚嘅皇后，仲為家人預備溫馨嘅晚餐，亦唔會將小朋友交比奶媽照顧，而係會自己肩負起照顧同埋教育孩子嘅責任，並陪伴佢地一同成長～
Photo from Pinterest
日皇明仁夫婦貴為日本皇室最崇高嘅象徵，但不平凡嘅身份卻有住平凡嘅愛，兩人互相扶持相伴到白頭，周不時都會被影到日常嘅甜蜜舉動，多年來每日都會牽手散步，真真正正地攜手走過數十載，兩人為彼此犧牲、包容，共渡一生，係每個人最憧景嘅愛情！
Photo from Pinterest
Text：TopBeauty Editorial
Photo Source：Pinterest, Instagram
