甘心做配角27年，300磅鐵漢卻擁有柔情內心～自強不息金牌綠葉林雪：做演員永遠無下一班車。

By Michelle on 11 Oct 2018

Digital Editor

有一種表演者，觀眾成日係電影或者係電視上見到佢，但總係講唔出佢叫咩名；另一種表演者，演技深入人心，做過嘅角色家傳戶曉，但觀眾反而講唔出電影戲名—呢一類表演者，佢哋係萬年綠葉、金牌配角，好少見佢擔大旗做主角，但佢就係擁有無可取替嘅魅力，而呢種光彩，係萬年綠葉上總係顯得特別燦爛。林雪，就係呢個表演台上一片小小嘅綠葉，喺港片式微嘅今日，演出過嘅電影，有質亦有量，可謂港產片新一代嘅配角之王。

Photo from from Weibo

年紀輕輕場務出道

電影中嘅林雪，精湛演技配上一口鄉音，將唔同角色都演得出神入化，同時充滿喜感，往往都令觀眾留下深刻印象。林雪操一口「唔咸唔淡」嘅廣東話，細個一直喺天津生活嘅佢，15歲跟隨屋企人嚟到香港生活。70年代嘅香港雖然無宜家咁繁榮，但總算係萬家燈火；相反，林雪細個生活嘅地方仍然係鄉下地方，周圍都係平房，人們出入都係騎單車，推木頭車。

Photo from from Sina

移居後，年紀輕輕嘅林雪當然有一刻為眼前美好嘅繁華夜景興奮過，但好快就打破咗佢嘅美夢—現實生活充斥住壓力，林雪一家人住嘅地方係貧民窟，又被稱為三不管地帶（中國政府不管、英國政府不管、香港政府不管），無水無電、環境惡劣。

Photo from from Weibo

林雪為咗維持生計，放棄讀書，做一啲粗重工作。風漾年華嘅青春歲月，佢已經跑去做苦力。16歲?年，佢喺油麻地果欄做搬運，每日凌晨兩點番工，朝早10點收工。由於廣東話講得唔好，畀人叫「上海仔」，人哋推30斤貨，大隻健碩嘅林雪可以推80,90斤。出賣勞力嘅工作最重要係唔怕蝕底，一樣有人會讚賞你，但做錯嘢換嚟嘅就係「一巴掌」。

Photo from from Weibo

年輕時喺街頭混日子，難免係無所事事、惹是生非，因為係街頭打交，間接認識咗一啲出名嘅武師，比如係林正英同洪金寶，都間接帶咗佢入「電影工作」。林雪回想自己第一次接觸「電影工作」，其實就係做唔起眼嘅場務，年紀輕輕嘅佢覺得拍電影好新鮮：有明星睇、有飯盒食、又有人工收，慢慢對電影產生興趣。

Photo from from Sina

燈光、劇務、製片、攝影……呢啲同演戲仲有一段好遠距離嘅工作，林雪都做過好多年。趺趺碰碰嘅路途上，或者佢都佢無諗過自己有一日會成為大銀幕上嘅演員，偏偏一副「打不死」心態，肯博肯捱，甚至試過不收分文，只係要求要兩個填飽肚子嘅飯盒，問導演畀自己參與演出，即使係零對白，只係一個肥仔經過鏡頭嘅晝面，佢都願意做。終於黃天不負有心人，開始有導演肯比機會佢。

Photo from from Sina

願意畀機會佢嘅伯樂，就係曾經合作無間嘅導演杜琪峰。杜琪峰跟林雪講：「拍《槍火》，你就是演員。」呢句說話鼓勵咗林雪，喺《槍火》嘅演出，林雪內斂細緻嘅演技被提名台灣金馬獎最佳男配角，雖然最終無獲獎，但已經贏盡圈內人口碑，從此「林雪」呢個名，就變得廣為人知。即使係電影市道低迷，好多演員都無戲拍嘅日子，林雪仍然每年參與10部以上嘅演出。上年就憑《樹大招風》獲得第十一屆亞洲電影大獎最佳男配角，大概就係對佢自強不息精神嘅回報。

Photo from From Weibo

雖然一直唔愁無戲拍，但無奈受形象所限，林雪頂多只係演配角，除咗認命，就只有默默耕耘。雖然係做綠葉，但佢都做足100分，林雪笑言：「我每次擺自己個位都唔係綠葉嘛，當正係主角，咁嗰場戲焦點真係喺我度，係咁投入去做會發揮得更好。」

Photo from from Weibo

林雪有一副「三餐唔憂」嘅身型，佢自己反而感恩電影為佢帶嚟嘅豐足，除了係生活上嘅改變，更多嘅係事業上嘅成就感：「我三餐係無要求，求其放入口填飽肚，對生活要求好低，但對電影工作就希望可以更上一層樓，每日都想有進步空間。」

Photo from from Sina

肥係林雪麻甩嘅鐵漢外表，那麼柔情就係佢內在嘅溫柔。林雪曾經喺訪問中表示，自己最希望拍一套「偉大嘅愛情文藝片」，唔了解佢嘅人可能對呢個鐵漢子大跌眼鏡，但事實上，林雪本人從來都唔似佢喺警匪片入面咁霸道同麻甩。「柔情似水」嘅佢生活閒時喜歡插花，仲上過插花班。呢種搞笑嘅「違和感」，令小編都不禁諗：林肥只是佢嘅花名，並唔係佢嘅內在。