眨眼出道19年！失落影后不減熟女韻味，阿Sa進軍美容界開自家品牌，蛻變事業型智慧熟女超吸金！

蔡卓妍阿Sa 千禧年出道，當年18歲卜卜脆一臉稚氣，翌年更拍住鍾欣桐以19歲最年輕之齡喺紅館開演唱會～19年過去，現年36歲嘅阿Sa已經由昔日稚氣甜姐兒成為時尚熟女，琴晚更憑《非分熟女》第3次入圍金像獎，雖然最後不敵眾強敵，跟影后寶座再次擦身而過，但阿Sa嘅事業可以話係屢創高峰！最近佢就推出自家品牌ENFANTSKIN 泡泡面膜，更指係自己嘅「bb」出世，可見阿Sa 有幾著緊自己投資嘅事業。

Photo from choisaaaa ＠ ig

自2000年 入行以嚟，阿Sa一直都係歌、影雙線發展，由早期Twins「賣青春不賣聲」，歌藝平平庸庸，以活力同人氣搭救，加上流行曲朗朗上口，當年真係小學生至大學生都係Twins嘅粉絲，每次表演雖然都有人批評歌藝強差人意，走音不斷、但Twins人氣不減，演唱會場場都叫好叫座，大概當年仍然未流行韓團，時勢造出呢對女英雄吧～

Photo from from 風箏與風 Official MV

2001年，阿Sa拍攝第3套電影《戀愛起義之不得了》，由於喺電影中演藝受到注目，令佢有份拍住陳奕迅，於電影《常在我心》擔正做女主角，更獲得《第21屆香港電影金像獎》「最佳新演員」提名。

Photo from 戀愛起義之不得了 劇照

每個演員都需要不斷突破自己，擴展戲路。初期阿Sa因形象所限，一直都偏向飾演傻氣女生，直至2005年，佢於《情癲大聖》中醜化自己，爆牙、爛面、以終極醜女形象拍愛情片，可以話係為電影而犧牲。當年只有23歲，呢位小妮子仲係可以話入世未深，已經深明要食娛樂圈呢行飯，就要明白「突破自己」嘅重要性。

Photo from 情癲大聖 劇照

2007年，阿Sa唔單止喺海外或香港，更連環獲得多個與電影有關嘅獎項，例如喺「香港特區10周年電影選舉」中，獲得由觀眾所投票選出「我最喜愛新世代女演員」同由業內人士選出嘅「最具潛質女演員」獎項，再次奠定咗佢於演藝事業上站得住腳。同年，更憑《妄想》成功喺「第11屆韓國富川國際幻想電影節」首封人生第一個最佳女主角。

Photo from ig ＠ choisaaaa

同年，只有25歲嘅阿Sa，拍住戲劇大師詹瑞文參演《戲王之王》，飾演北方姑娘「單丹」，全程都要戴假胸，並以鄉音演出。出眾嘅演技令佢於「第12屆香港電影金紫荊獎」中奪得「最佳女主角」同「最受歡迎女主角」，撼贏范冰冰、鞏俐、梁詠琪、劉若英一眾前輩成為雙料影后，並首次入圍「第27屆香港電影金像獎」影后提名。

Photo from 戲王之王 劇照

多年嚟，阿Sa一次又一次挑戰自我，2015年電影《雛妓》中，首次挑戰電影尺度突破以往形象，唔單止喺鏡頭前爆粗，更有多場性愛場面，而今年電影《非分熟女》中，又有自慰場面同著性感內衣跳鋼管舞鏡頭，佢坦言未接拍電影前都有考慮擔心自己會被定型為豪放女，但為咗好嘅電影劇本，佢選擇豁出去。

Photo from 雛妓 劇照

19年過去，阿Sa由稚氣?妹變韻味熟女，顯然落咗唔少苦功～所謂戲如人生，雖然阿Sa今年再次失落金像影后，但聰明嘅阿Sa又點會限制自己嘅人生呢～最近成功研發個人美容品牌，推出自家面膜，阿Sa更身體力行以多年來引以為傲嘅無瑕肌做「生招牌」，被問到人生大事，阿Sa多次強調「唔急住結婚」，確實一洗昔日總愛大過天嘅稚氣，變得更成熟、再次說明女兒身都可以頂天立地。

Photo from ig ＠ choisaaaa

過往唔少名人藝人例如劉嘉玲、范冰冰、徐淑敏都有推出自家品牌，講到最吸金一定係美國名媛Kylie Jenner，自家品牌Kylie Cosmetics 2015年成立，短短18個月時間營業額已經高達4.2億美金，就連專櫃品牌Tom Ford都足足花咗10年先有超過5億美金嘅營業額。阿Sa 參考前人成功經驗，雖然名氣固然不及國際名媛，但起碼證明到阿Sa由始至終都係一個獨具惠眼嘅聰明女！希望佢日後可以繼續有更多人生嘅「突破」！

Text：TopBeauty Editorial

Photo source：Instagram