吳浩康自爆曾背叛女友偷食！內疚卻又刺激 現怕失去老婆 決心浪子回頭不再出軌
Photo from 節目截圖
吳浩康當年同鍾舒漫拍拖，曾達談婚論嫁階段，可是吳浩康被踢爆連追6個女仔，更被傳媒影到當街同另一女子街頭親熱，搞到形象插水更分手收場。主持人田蕊妮直言吳浩康曾被歸為「渣男」一族，自從結婚升呢做爸爸後，又去做「職安真漢子」養家，一下子變成公眾心中的好男人，吳浩康即謙稱：「一班港鐵入面有幾多個咁樣嘅男人，我只係做咗2年啫，我唔好意思認，大把人做得耐過我。」
Photo from ig@ngdeep
直言已修心養性
吳浩康坦言，他曾做過「渣男」背叛女友出軌，田蕊妮指他現在予人完美的感覺，又指吳浩康浪子回頭，吳浩康即笑言：「更新人士吧最多，唔好話浪子回頭。」田蕊妮問他現在見到靚女會不會心癢，吳浩康直言已經修心養性：「冇㗎喇，煩惱嘅開端，好驚。你睇得太化就唔係愛，愛就係好想都唔去。」
Photo from ig@ngdeep
剖白出軌心情
對於曾經背叛女友鍾舒漫，吳浩康不諱言當時感內疚，但又按奈不住：「因為又有另一面誘惑嘅引力，所以某程度上就係經歷咗好多次呢啲，覺得好攰，就唔再去。係好矛盾嘅事，你明知係錯，明知係出賣，但係另一面又想去做嗰件事，出軌有出軌嘅刺激，或者嗰個對象，本身都會對佢有一個好感，同埋我自己就好幼稚地覺得好多人鍾意我，好似覺得自己好勁。」
Photo from ig@ngdeep
不想失去老婆
田蕊妮再問，如果男人偷食被發現，是否必然果斷放棄小三，吳浩康堅定說：「老婆最重要」、「得一個老婆豬，冇其他女人。」同時又表示怕麻煩，同埋不想失去老婆：「我會揀唔出軌，見到個女仔靚會自己行開一點。」在螢幕前公開冧妻。
Photo from ig@ngdeep
吳浩康過去曾跟胡定欣、莊思敏、鍾舒漫、崔碧珈及李昭南拍拖，他同鍾舒漫已達談婚論嫁階段，可是在2015年3月被踢爆一腳踏兩船，女方宣布分手。2022年，吳浩康同郭思琳奉子成婚，婚後的他放下身段，做地盤工賺錢養家，成功一洗昔日的負面形象。
Text：TopBeauty Editorial
