男友的前度就是煩!7個行為令你恨之入骨—假大方扮遇偶、節日扮親密祝賀你男友!
世上最難拆嘅局有二,第一係婆媳糾紛、第二就係現任同前度嘅微妙關係。可能你自問係潔身自愛、向前看嘅灑脫女人,但仍有唔少作為前度身分嘅女人,鐘意無視現任,苦纏跟自己已經分手嘅男人,作為女人,真係對呢種唔識自愛、又令人關係破列嘅人恨之入骨~細算女人最憎男友前度嘅7個行為,有講中你嘔心瀝血嘅經歷嗎?如果講你宜家處境嘅話,更要同自己另一半多啲溝通,話畀佢知你感受吧~
#1 事無大小都搵佢
或者佢仍然對你男朋友有感覺,又或者只係純粹想想挑戰你嘅地位~呢種前度討厭在於總有無窮無盡嘅藉口搵你男朋友—有嘢想歸還、屋企電器壞咗唔識修理、想見面探寵物,總之佢會不惜一切想介入你同男朋友嘅生活。
Photo from from pinterest
#2 私底下聯絡你
有一種前度分手後仲會「柯南上身」,起現任底~知道你聯絡資料後,仲會聯絡你,有意無意講一啲令你難堪嘅說話。比如係勸你退出,指責你男朋友係渣男,而你係第三者等等,反正就係有心破壞你哋嘅關係吧~
Photo from from pinterest
#3 向親友埋手
有種女人不甘你男朋友選擇咗你而放棄佢,即使你未必係第三者,但佢哋仍然會發揮女人愛比較嘅本色。得唔到你男朋友嘅歡心,佢哋會向你男友親朋好友方面入手,故作可憐、強調自己已經完全融入咗去你男朋友嘅圈子,所以即使分手後仍然要跟你男友身邊人保持關係,目的只有一個—證明自己地位。完全係自欺欺人嘅舉動。
Photo from from pinterest
#4 扮偶遇
「hi,乜咁啱啊?」佢經常都會喺你男友工作地方、屋企、出沒地方出現扮偶遇,邊有咁多巧合!雖然每次偶遇都無主動出擊,但扮唔在意背後其實只不過想你男友諗起佢,寄望可以因此重修舊好~
Photo from from pinterest
#5 大時大節一定會送上祝賀
雖然分手後已經好少聯絡,但每逢大時大節就總會打「千字文」畀你男朋友,寫下肺腑之言—「仲記得我哋第一次嘅聖誕......」句句煸情又動人,但就無考慮自己身份,真係令人好作嘔。
Photo from from pinterest
#6 假大方,另有目的
佢唔單止約你男朋友食飯,仲假大方表示你都可以一齊出席,想親自認識你。各位女生一定要提防呢一種女人,敢於將戰線主動拉近玩「埋身戰」,話無居心都係呃你~
Photo from from pinterest
#7 喺背後講你壞話
唔單止主動跟你男朋友保持朋友關係,仲會拎你嚟做討論話題,閒談間有意無意跟你比較,甚至講你壞話。無半點避忌不特止,恨不得透過講壞話將你印象分扣至負分~
Text:TopBeauty Editorial
Photo source:pinterest