那些年我們追過的台劇！少女心劇情一世難忘，經典造型填滿青春的回憶～

By joycecheung on 26 Apr 2019

想當年中學時期韓風仲未咁盛行，台灣偶像和劇集風靡一時，成為同學間熱烈討論嘅話題，陪伴唔少人嘅青春！而家回想起來，雖然大部份劇情非常老土，造型亦都無法理解，但當中嘅少女心情節真係令人相當回味，即使係十幾年後嘅今日都可以再睇一次！你話係懷舊派又好，有情意結也好，而家嘅劇集真係好難揾返當年嘅味道～我地一齊回顧下當年流行嘅台劇，你一定總有一套睇過！

Photo from 流星花園

1.流星花園（2001)

流星花園可以話係有記憶以來第一套青春偶像劇！當年F4迷倒一眾少女，更分裂出「道明寺派」、「花澤類派」，富家子戀上窮家女嘅劇情真係令每一位少女有唔少幻想！其中片尾曲《流星雨》更唱到街知巷聞，所有80、90後一定聽過！

Photo from 流星花園

2.終極一班（2005)

終極一班係講述一班高中生每日打架、唔讀書、但充滿正義感、團結起來嘅故事，內容非常熱血，呢部劇集亦都令飛輪海紅透半邊天，甚至到2018年已經拍到《終極一班5》，雖然而家睇返內容有點誇張無厘頭，但成件事真係好青春呀！

Photo from 終極一班

3.王子變青蛙（2005)

經典嘅王子喜歡上灰姑娘嘅故事有邊個少女會不愛！想當年小編真係俾男主角明道暈得一陣陣（掩面），劇情雖然老土，英雄救美情節絕對不少得，但觀眾就係鍾意睇呢啲，最高收視更超過流星花園！一眾80，90後一定對183 club好熟悉，因為呢部劇集令佢地爆紅，亦同女主角陳喬恩組成嘅組合七朵花合唱插曲，青春時期唱K必點歌！

Photo from 王子變青蛙

Photo from 命中注定我愛你

4.惡作劇之吻（2005)

呢部台劇真係經典中嘅經典，天才少年戀上單純少女，加上林依晨同鄭元暢呢對CP至今仍然令人津津樂道！當年呢個組合有幾多人希望佢地真實會係埋一齊～加上內容有搞笑、有溫馨、有甜蜜、有悲傷，雖然已經時隔14年，但唔少人都會翻看，而且毫無時代嘅違和感！當中嘅主題曲以及插曲亦為人熟悉，雖然係2007年開播續集《惡作劇2吻》，但唔少粉絲都大叫唔捨得呀！