免破壞原有房間裝修～輕鬆改造女生房間，小空間也有自己衣帽間！

By Maggie on 29 Apr 2019

Digital Editor

love yourself and the rest will follow.

香港地，地少人多，可以唔洗同兄弟姊妹分享同一房間，實屬幸運！小女生可以自己一人獨霸房間，真係人生一大樂事！所以對於房間嘅打扮絕不馬虎！聽得最多嘅就係買波波燈掛喺房內裝飾一下～但其實房間嘅打扮係可以千變萬化，而且可以造到實用性極高！依家就同大家分享下啦！

無痕牆布：免破壞牆壁

對於租屋唔方便弄污白牆嘅女生可以試下無痕牆布。無痕牆布有別於一般牆紙，無痕牆布撕下來後不留痕跡，白牆毫無損傷！做法好簡單，只要先選一塊自己喜歡嘅布作為無痕牆布，然後刷上漿洗劑（可於五金鋪購買到），等布被漿洗劑弄濕透之後附著在牆上，利用刮刀將布料刮平，遇到開關地方先貼緊，再用小刀割開，再把上面布料撕下來。想復原時，只需將布撕下來後用抹布擦一擦，牆壁就同原本一樣了！

Photo from pinterest

超市層架：免螺絲自由砌出無數種搭配衣帽間

香港環境擠逼，房間嘅空間一般都係有限的！有時甚至逼著同家姐細妹分享同一房間，想要個人衣帽間都難！利用超市層架嘅好處係唔洗螺絲，超簡單快捷就可以砌到～而且可承受非常重嘅力量，實用性高！價錢都好便宜！超市層架左右兩邊都有洞，只要購買可配合服裝店用到嘅AA柱配件就可以自由砌出無數種搭配嘅組合衣帽間！

Photo from taobao

木地板：可拆無痕鎖扣木地板

實用、免破壞房內本來裝修係唔夠的！要將房間嘅整體感覺弄得唔廉價，有高格調感覺其實可以靠木地板。唔想大工程又唔想破壞原本地面嘅女生可以試下可拆無痕鎖扣木地板！注意，這並唔係可貼式嘅背膠地板，背膠地板貼後只會令原有地面變得粘粘！而鎖扣安裝木地板不但可拆後重復使用，安裝而且簡單！只要確認一下原有地面無凹凸不平就可以開始換上。無痕鎖扣木地板有分公母兩邊，只要將兩邊側斜30度插入其並放平就可以了！