梁家輝一家旅行渡假，肉緊攬實老婆畫面超甜蜜～孖女向父母示愛：家是一切！
梁家輝兩個囡囡梁穎晨Chloe同埋梁靜曦Nikkie，日前就喺ig上載一家人同好友鍾鎮濤、周汶錡等人，到馬來西亞旅行嘅相，孖女仲各自帶埋男朋友，非常熱鬧～梁家輝人前永遠將妻女放喺咀邊，曾經講過「我太太是世上最好的女人，是她的好激發了我的好。」今次去旅行影既相，仲見到佢攬到老婆實一實，從梁家輝同太太江嘉年眼神中流露出發自內心嘅肉緊、疼愛同被愛嘅喜悅，再一次證明梁家輝錫老婆唔單止係形象，係確確實實嘅行動同事實～
Photo from chloe_leungoe ＠ ig
眾所周知梁家輝係愛妻好男人，顧家、專一、更係兩個女心目中嘅好爸爸...Chloe同Nikki生於健康幸福嘅家庭，更遺傳爸爸重視家庭嘅概念，日前細女Nikkie就喺ig上分享一輯家庭相，冧爆屋企人話：「家，就係一切（Family is everything）」相信作為父母嘅梁家輝同江嘉年，見到女女感受到兩公婆細到大對佢哋嘅照顧同護蔭，如今已經亭亭玉立，懂得為家庭付出逗父母高興，真係溫馨點滴在心頭～
Photo from chloe_leungoe ＠ ig
Photo from chloe_leungoe ＠ ig
喺梁家輝身上，「愛妻」唔係一個形象，而係鐵一般嘅事實。有傳太太因為身體出現毛病，服用藥物而令身材走樣，但喺梁家輝眼中，太太就係天使一樣。佢曾經喺訪談節目上大讚太太有智慧，擅長「將家庭作為事業」，令一家四口健康甜蜜。當初太太對梁家輝堅定嘅信任，換來好多女人羨慕一生嘅幸福，亦成為佢哋30年情比金堅嘅基石，更成為孖女擁有健康家庭觀念同幸福童年嘅基礎～
Photo from chloe_leungoe ＠ ig
人前人後，兩公婆都係手拖手過日子。女女Nikkie亦引以為傲，上載父母牽手相片寫下「感情嘅追求！（Relationship goals） 」大概就係爸爸媽媽用行動證明到畀愛女睇，何謂一輩子嘅牽手、一輩子嘅愛。
Photo from nikkiechleung ＠ ig
梁家輝、江嘉年，一對分不開嘅名字，即使夫妻二人加埋都過百歲，但閃光彈仍然非常耀眼並為人羨慕，大概就係來自「你是我的唯一」嘅魔力。對男人而言，有一個同甘共苦，伴你由窮小子捱到出頭天，相信你為人、付予你鼓勵，既為老婆，又是情人，更是朋友嘅太太，確實係幾生修來嘅福氣～
Photo from nikkiechleung ＠ ig
Text：TopBeauty Editorial
Photo source：Instagram
