煮飯不單止醫肚，更是心靈良藥～專家：下廚能調節壓力，成為你的充電時光～
都市人早出晚歸，想話番屋企煮個飯都未必有時間。但從今以後你或者要考慮一下親自下廚煮飯仔了～密西根州烹飪藝術治療師 Julie Ohana 指出，煮飯可以放鬆心情，係一種減壓同保健嘅方法，所指嘅就係「烹飪療法」，方法早已經得到科學證實，適用於壓力管理、情緒調節、自我表達、人際溝通同社交能力都有幫助。
＃1 離開「工作模式」
唔知你有無發現，番咗一日工，有時候番到屋企仍然要處理大大小小嘅事務，直到瞓前最後一刻都未能真正放鬆，有時真係心入面吶喊：好攰啊！個腦長期都係工作模式，如此精神疲憊真係令人受壓而不自知。研究指出培養放工後煮飯嘅習慣，大腦自然會由「工作模式」轉為「家庭模式」。女生們可以將下廚過程化成充電時光，精神上脫離工作，會有意想不到嘅療癒效果！
Photo from wongmanyik @ ig
＃2 工作乏味？入廚可以發揮你嘅小宇宙！
唔知你有無同感～工作令你產生厭倦同沉悶感往往都係因為工作性質單一、處於同一個崗位太耐、缺乏心理挑戰，久而久之真係會令你大腦生鏽、精神窒息。將廚房變成你嘅小天地吧！你可以發明新食譜，展現自己嘅才能，將你嘅創意發揮於新菜色上～伴侶試過你嘅手勢，對你廚藝讚不絕口，話唔定可以填補你心入面缺少了嘅一個方塊呢～
Photo from wongtsuiyu @ ig
＃3 重新定位你嘅注意力
任何形式嘅烹飪，例如係整蛋糕、麵包，都可以令我哋專注力由工作或生活中惱人嘅挫折，轉移到積極嘅事情上。即使當日心情鬱鬱寡歡，你會發現自己隨住專心下廚而慢慢將煩惱忘記。當然，煩惱並唔會完全消失，但至起碼可以幫助你停止憂慮。
Photo from wongmanyik @ ig
＃4 得到成就感
無論係新手定係經驗豐富嘅廚師，每次下廚都有學習嘅空間。當你發現自己成功為另一半同家人準備一餐好餸，呢種掌握感同成就感真係異常美妙～為自己精神健康著想，係時候做個「入得廚房、出得廳堂」嘅女士喇～
Text：TopBeauty Editorial
Photo source：Instagram
