真愛晚一點來也沒關係！汪明荃羅家英愛超過30年，同甘共苦用愛打敗病魔～

By Aisa on 03 May 2019

一個追逐夢想的女生，深信未來是屬於相信心中美夢的人。

前日就係汪明荃同羅家英結婚10周年紀念，Liza姐喺IG上發文慶祝呢個重大嘅日子，佢貼出合照並寫道：「羅先生和羅太太慶祝結婚十周年紀念！飲杯！祝願大家身體健康！開開心心！」不經不覺，阿姐同家英哥已經相愛超過30年，直到宜家都依然恩愛，周不時仲會喺社交媒體上放閃，睇到佢地呢一對同甘共苦嘅戀人如此幸福，令唔少喺愛情路上跌蕩過嘅人都話重新相信愛情！

Photo from wang_liza @Instagram

兩個同樣經歷離婚嘅人，有對愛情有完全唔一樣嘅看法，當年家英哥對阿姐一見鍾情，後來再三向阿姐求婚，但阿姐因為以往經驗，以及事業心重，再加上唔想被婚姻約束，多次拒絕呢門婚事～

Photo from wang_liza @Instagram

不過家英哥並無灰心，就算唔可以成為夫妻，佢都依然默默付出，後來阿姐患上癌症，家英哥不離不棄，陪伴身邊對抗病魔，最後阿姐奇蹟地康復～

Photo from wang_liza @Instagram

不過天意弄人，上天就好似要比更多考驗呢對戀人，輪到家英哥得到癌症，而且係晚期，面臨生命嘅巨大變化，阿姐終於意識到自己對家英哥嘅感情早已超出朋友關係。

Photo from wang_liza @Instagram

反過來，變成阿姐照顧家英哥，而上天可能被呢對戀人嘅真誠打動到，家英哥後來奇蹟地康復。喺抗癌嘅日子中，家英哥曾經寫過一封信比阿姐：「對我來說晚一點沒關係，只要有一個好的結尾」「我們之前身體不好，都是經過生死考驗的人，你剩半條命，我也剩半條命，我們就合成一條命，相依為命，同心到老。如果下輩子在一起，我很願意，你呢？」